Узоқ тортишувлардан сўнг қирғизистонликлар давлат байроғи билан хайрлашмоқдалар
Парламент депутатларининг кўпчилиги президентнинг давлат тимсолини ўзгартириш бўйича ташаббусини ёқлади.
Бугун, 20 декабрда Қирғизистон парламенти давлат байроғини ўзгартириш тўғрисидаги қонунни қабул қилди. Ҳужжатни 90 депутатдан 59 нафари қўллади, беш депутат қарши овоз берди. Қолганлари (26 нафари) турли сабабларга кўра овоз беришда иштирок этишмаган.
Қирғизистонда давлат байроғини ўзгартириш ташаббуси кўтарилганидан бери жамоатчиликда қизғин муҳокама бошланди. Айниқса, ижтимоий тармоқларда бу таклифга қарши турли тадбирлар, флешмоб ўтказилмоқда. Жумладан, ижтимоий тармоқларда одамлар президент Садир Жапаровнинг саҳифаларида ўз норозиликларини ёзиб қолдирганлар.
Иш шунга бориб етдики, байроқнинг ўзгартирилишига қарши митинг ўтказишга чақирган фаоллардан бири Афтандил Жўрўбеков оммавий тартибсизликларни уюштиришда айбланиб, ҳибсга олинди. Суд қарори билан у тергов тугагунга қадар, яъни икки ойгача қамоқда қоладиган бўлди. Лекин митинг, чекланган ҳолда бўлсада, барибир ўтказилди.
Муҳокамага ҳаттоки, таниқли россиялик дизайнчи ҳам иштирок этиб, байроқнинг янги варианти бўйича ўта салбий фикрини билдирган. Маҳаллий рассомлардан бири “Қуёшнинг сўнгги ботиши” номли тасвирини чизиб, интернетда эълон қилди.
Дастлаб байроқни ўзгартириш ташаббусини парламент раиси Нурланбек Шакиев ва депутат Улан Примов кўтариб чиқишган. Уларнинг фикрича, байроқдаги Қуёш тасвири кунгабоқарга ўхшаб қолган ва шу сабабли давлат мустақил сиёсат юрита олмасдан, ривожланиш яхши бўлмаган. Кейинроқ Миллий хавсизлик давлат қўмитаси раиси Қамчибек Ташиев ва президент Садир Жапаровлар ҳам бу ташаббусни қўллашларини маълум қилишган.
Мамлакатда аввалдан дўст бўлиб келишган бу икки раҳбарнинг фикри жуда катта аҳамиятга эга ва ташаббус барибир амалга ошади деган маънони англатади. Бунинг далили сифатида президент Садир Жапаров 16 декабрь куни Бишкекда ўтган Иккинчи халқ қурултойида байроқни ўзгартириш ташаббуси ундан чиққани ва парламент раисидан бу масалани кўтариб чиқишни сўраганини маълум қилди.
Қурултой делегатларидан айримлари бу таклифга қарши гапирган ва бу залда ўтирганларнинг олқишларига сабаб бўлган бўлса ҳам, президент бу таклифни қўллашга чақирди. Бироқ қурултой қарорларини қабул қилишда бу масала овозга қўйилмади.
Янги вариантда амалдаги байроқдаги тўлқинсимон қуёш нурлари тўғри чизиқларга алмаштирилган. Қирғиз халқида жуда катта маъно ва аҳамиятга эга бўлган тундук – бўз уйнинг устки қисмидаги айлана ичидаги таёқлар сони учтадан тўрттага алмаштирилди.
Қирғизистоннинг амалдаги байроғи давлат рамзларидан бири сифатида 1992 йилнинг 3 мартида қабул қилинган эди. Унинг муаллифларидан бири журналистларга бу ўзгаришларга қарши эканини айтган. Шу билан бирга у шу кунгача турли сабаблар билан байроқ муаллифларига муаллифлик ҳуқуқини берувчи ҳужжат берилмаганини ҳам айтиб, шикоят қилган.
Бунгача Қирғизистоннинг герби ва гимни бўйича ҳам турли тортишувлар бўлиб, оқибатда давлат гимнининг баҳс туғдирган учинчи куплетидан расман воз кечилган эди.
Оқбура, Бишкек.
Сурат интернетдан олинди.
