Олтинчиси: АҚШ Қирғизистоннинг яна бир ширкатини санкциялар рўйхатига киритди
Америка Қирғизистон ва минтақанинг бошқа давлатларини ғарб санкцияларини “айланиб ўтишда” айбламоқда.
АҚШ Молия вазирлиги санкциялар рўйхатига киритилган товарларни Россияга етказиб беришда айблаб, Қирғизистон ва Тожикистоннинг айрим ширкатларига нисбатан санкциялар жорий этди. 12 декабрь куни қабул қилинган ҳужжатда санкция рўйхатига киритилган шахслар ва ширкатларнинг янги рўйхатида турли мамлакатларга дахлдор юздан ортиқ номлар бор.
Жумладан, Қирғизистондан бу рўйхатга “Weitmann Handeln Allianz” ширкати киритилган.
Бу ширкат Россияни маълумотларни қайта ишлаш ва сақлаш жиҳозлари билан катта миқдорда таъминлаб келганликда айбланади.
Эслатиб ўтамиз, бунгача Қирғизистоннинг беш ширкати ана шундай “қора рўйхатга” киритилган эди. Жорий йилда “RM Design and Development” ва «Прогресс Лидер» масъулияти чекланган жамиятлари (МЧЖ), «ГТМЭ Технологиялар» ёпиқ турдаги ҳиссадорлик жамияти ва «Қарғолайн» МЧЖ ширкатлари киритилган. Улар ўтган йилнинг март ва июн ойларида таъсис қилинган бўлиб, Россияга миллионлаб долларлик ғарб санкциялари билан тақиқланган маҳсулотларни етказиб бериб туришган.
Америка томонига кўра, санкцияга тушган товарларни қайта экспорт қилиш учун Россия махсус хизматлари жалб қилинган. Қирғизистондан товарларни олувчи фирмалар Россиянинг мудофаа саноати таъминотчилари бўлган, дейди Washington Post нашри. Товарлар асосан Қозоғистон орқали олиб ўтилган.
Ўшанда Қирғизистон Ташқи ишлар вазири Жээнбек Қулубаев «Россия-1» давлат телеканалига берган интервьюсида Бишкек Ғарбнинг иккиламчи санкцияларини жорий қилишига қарамасдан Москвага ҳамкорлик таклиф қилишини айтган.
Бироқ орадан икки ҳафта ўтиб, 2-июн куни «Марказий Осиё – Европа иттифоқи» саммитида Қирғизистон президенти Садир Жапаров санкцияларни муҳокама қилиш учун ЕИ билан мулоқотга очиқ экани ва Европадаги ҳамкорларининг санкцияларга амал қилиш чақириқларига «тушуниш билан» қарашини айтди.
Бундан бир йил аввал АҚШ Россиянинг ҳарбий тармоғига кўмаклашган, дея Қирғизистоннинг Tro.Ya деб аталган бир ишхонасига қарши санкция киритган эди.
Санкция киритилган ширкатлардан бири, Тожикистоннинг Kafolati Komil ширкати эса БАА орқали Россияга хорижда ишлаб чиқарилган самолёт эҳтиёт қисмларини жўнатишда айбланган.
АҚШ молия вазирлиги тарқатган хабарга кўра, санкцияларга алоқадор бу чоралар катта еттилик (G7) давлатларининг 2023 йилнинг 19 майида қабул қилган қарорлари асосида, Россиянинг ҳарбий салоҳияти ва армиясини қўлловчи маҳсулотларнинг у ерга етказиб берилишини олдини олиш учун кўрилмоқда. Санкцияларнинг мақсади – Россиянинг иқтисодий имкониятларини камайтириб, унинг иқтисодиётини таназзулга олиб келиш, уни халқаро молиявий тизимдан чиқариб, фазони ўрганиш, мудофаа соҳасида зарур бўлган янги технологиялардан маҳрум қилишдир.
Бироқ Россия бу санкцияларни четлаб ўтишнинг турли йўлларини топиб, санкцияга киритилган эҳтиёт қисмлар, жиҳозлар ҳамда технологияларни олиб келишда давом этмоқда. Натижада Россия иқтисодиёти санкциялардан кутилган даражада жабр тортмаган. Ғарб мутахассислари буни тан олган ҳолда Россия иқтисодиёти бу йил 3,5 фоизгача ўсиши мумкинлигини башорат қилмоқдалар.
Оқбура, Бишкек.
Расм интернетдан олинди
