Қирғизистон ва Ўзбекистон ўртасида иккита чегара ўтказиш пункти қайтадан очилди

Бугундан бошлаб икки давлат фуқаролари чегарадан оддий ички паспорт билан ўта оладилар.

Бугун, 1 сентябрь куни Қирғизистон ва Ўзбекистон ўртасида бирданига учта чегара пункти қайта очилди. Қирғизистон президентининг Ўш вилоятидаги вакиллигининг маълум қилишича, эрталаб Қирғизистоннинг Аравон ҳамда Ўзбекистоннинг Марҳамат туманлари  ўртасидаги “Мингтепа-Қорабағиш” чегара ўтказиш пункти тантанали очилган.

Маълумотларга кўра, очилиш маросимида президентнинг Ўш вилоятидаги вакилининг биринчи ўринбосари, Андижон вилояти ҳокими, Аравон тумани ҳокимияти ва маҳаллий бошқаруви органлари раҳбарлари ҳамда маҳаллий аҳоли иштирок этган.

Андижон вилояти ҳокими Шуҳратбек Абдураҳмонов очилиш маросимида икки элни бирлаштирувчи режалардан яна бири амалга ошгани билан йиғилганларни табриклади.

«Авваламбор барчангизни кеча сиз нишонлаган Қирғизистон мустақиллиги куни билан, бугун Ўзбекистонимизда нишонланаётган Ватанимиз мустақиллик байрами билан чин юрагимдан табриклайман. Ҳурматли президентимиз ташаббуслари билан, қолаверса Қирғизистон президентининг қўллаб-қувватлови билан икки элни бирлаштириш бўйича жуда катта ишлар амалга ошириляпти», – дейди вилоят ҳокими.

Ўн йилдан ортиқ вақтдан бери ёпилиб турган ушбу чегара пункти икки давлат раҳбарларининг кўрсатмалари билан очилиб, Андижон вилоятининг Марҳамат тумани ва Ўш вилоятининг Аравон тумани ўртасидаги узилиб қолган алоқалар қайта тикланганига ҳар икки давлат маҳаллий аҳолиси хурсанд бўлмоқда.

Маросимга келган меҳмонлар учун кичик концерт дастури ташкил этилиб, ҳар икки томон бир-бирини табриклади. Бугундан бошлаб чегара пости махсус тузилган жадвал асосида ишлай бошлайди.

Шу бугун интернет булоқлари Ўзбекистоннинг Хонобод шаҳридан Қирғизистоннинг Жалолобод вилоятига ўтилувчи “Хонобод-Бекобод” чегара ўтказиш пункти фаолияти ҳам қайта тиклангани ҳақида ёзишди. Жалолободликлар бу воқеани бир неча йилдан бери интизорлик билан кутаётган эдилар ва чегаранинг очилиши ҳақида бунгача ҳам бир неча бор маълумот тарқалган ва маълумот нотўғри эканини билган маҳаллий аҳоли яна яхши кунларга умид қилиб яшаб келаётган эди.

Бекобод-Хонобод чегара пункти орқали ўтилса, Жалолободдан Ўшгача бўлган масофа қарийб уч баробар қисқаради. Авваллари жалолободликлар Ўшга ярим соатда етса, чегара ёпилгач, Ўзган орқали айланиб 1,5 соатда борадиган бўлишган эди. Айниқса, чегара постининг икки томонида яшаётган, қон-қариндош, қуда-андаларга қийин бўлаётган эди. Чунки ўзлари бўлгани 100-200 қадам нарида, лекин чегаранинг икки томонида яшаганлари боис бири-бириникига айланма йўл орқали 2 соатлик йўл босиб борди-келди қилиб келишарди.

Қирғизистон ва Ўзбекистон ўртасида 15 та чегара назорат-ўтказиш пункти бор. Уларнинг аксари 2005 йилда Ўзбекистон томонидан бир томонлама ёпиб қўйилган эди.

2016 йилдан расмий Бишкек ва Тошкент алоқалари яхшилана бошлагач, чегара постлари қайтадан очила бошлади. Бугунги кунгача икки давлат ўртасидаги 9 та чегара бекати ишламоқда.

Май ойида Қирғизистон Чегара хизмати Жалолободдаги «Бекобод», Ўшдаги «Қарабағиш» ва «Қорасув» чегара назорати бекатларини очишга тайёргарлик кўрилаётганини маълум қилган. Бу бекатлар 2010 йилда ўз фаолиятини вақтинча тўхтатган эди.

Ҳар икки давлат ўртасида қўшимча ўтказиш пунктларини очиш масаласи сўнгги бир неча йил давомида мамлакатлар ҳукуматлари томонидан муҳокама қилиб келинмоқда эди. Бундай пунктларни очишдан мақсад — маҳаллий аҳолининг борди-келдиларини ва икки давлат ҳудудида транспорт юк оқимлари транзитини енгиллаштиришдан иборат.

Бу икки давлат халқи, айниқса, чегара ҳудудларида яшовчи аҳоли учун иккинчи қувончли хабар. Аввалроқ 1-сентябрдан икки давлат чегарасини фуқаролар хориж паспорти билан эмас, ички ID карта билан кесиб ўтишига рухсат берилгани хабар қилинган. Бу янгилик бугун расман тасдиғини топди.

Чегарадаги бугунги вазият ва аҳолининг кўтаринки кайфиятини Мамур Ботиров исмли фейсбук фойдаланувчиси ўз саҳифасида ёзган пости яққол акс эттиради. У Фарғона вилоятининг Сўх туманидаги чегара постидан ID карт билан ўтганини ёзган.

“Бугун тонгда Сўхдан Фарғона томон йўл олиб, чиқишда қирғиз постига одатдагидек ЗАГРАН (чет элга чиқиш учун ишлатиладиган паспорт. – таҳр.) узатувдим, [чегарачи] майин овозда “Ака, ID карт беринг, илтимос”, деди. 5 кун олдин қовоғи осилиқ, хўмрайган биродарнинг муомаласидан лол қолдим. ID картни 2 секундда қайтариб берди. Илоҳо шундай муносабатлар абадий бўлсин, юртимиз тинч, осмонимиз мусаффо бўлсин. Бизга шундай имкониятлар яратган президентларимиз саломат бўлишсин. Барча юртдошларга байрам қутлуғ бўлсин. Ҳар бир кунимиз шундай эзгулик ва омадлар билан бошлансин. Азиз ватандошлар, гўзал Ўзбекистоннинг сўлим гўшаси – Сўхга марҳабо!” – деб ёзади Ботиров.

Ўзбекистон билан Қирғизистон ўртасидаги 1314 километрли чегара чизиғи тўлиқ аниқлаб бўлинган. 2022 йил ноябрида Тошкент ва Бишкек чегара бўйича 30 йилдан буён давом этиб келаётган баҳсларга нуқта қўйилганини билдиришган. Ҳозир бу келишувларни амалда юзага ошириб, расмийлаштириш жараёни давом этмоқда.

Оқбура, Бишкек.

Расм интернетдан олинди