Ана холос! Ўшдаги кўкбўри мусобақаси оммавий тартибсизликлар билан тугади
Ушбу финал мусобақасини кўриш учун келган президент Садир Жапаров кайфияти бузилиб қайтди.
Кеча Қирғизистон мустақиллиги кенг нишонланаётган куни Ўш вилоятидаги ипподромда кўкбўри (кўпкари, улоқ) бўйича “Дўстуқ” ва “Интимақ” командалари ўртасида анъанавий президент кубоги учун финал учрашуви бўлиб ўтди. Ўйин сўнггида Толас вилоятидан келган “Интимақ” командаси ғолиб деб эълон қилинди. Шунда мезбонлар норози бўлиб, жанжал кўтаришган. Норозилик бирпасда оммавий тартибсизликларга айланиб кетди.
Интернетда кенг тарқалиб кетган видеолардан кўриш мумкинки, одамлар ҳакамни ҳақорат қилиб, уни алмаштиришни талаб қилишди ва пластик шишалардаги сувларни ота бошладилар. Ўнлаб милиция ходимлари уни зўрға хавфсиз жойга олиб чиқиб кетишди. Ҳакам калтаклангани ҳақида ҳам маълумотлар бор.
Умумий ҳисобда 100дан ортиқ одам жабрлангани айтилмоқда. Икки одам: бир улоқчи ва милиция ходими касалхонага етказилган. Лекин улоқчи ўзининг ўйин пайтида жароҳат олганини айтган. «Тез ёрдам» машинасига ҳужум қилиниб, ойналари синдирилган, ҳайдовчи тан жароҳати олган.
Видеоларнинг бирида нуфузли меҳмонлар учун тайёрланган жойдан туриб, воқеани кайфияти бузилган ҳолда кузатиб турган президент Садир Жапаровни, Бош прокурор Қурманбек Зулушевни ва Олий суд раиси Замирбек Базарбаевни кўриш мумкин.
@talant.sagynbaev #бишкек #кыргызстан #ош #кокбору #садыржапаров ♬ оригинальный звук – Талант Сагынбаев
Кўкбўри бўйича мамлакат кубоги финалини айнан Мустақиллик куни ўтказиш мамлакатда анъанага айланиб қолгани, бироқ бунгача сира бундай ҳолат юз бермагани айтилади.
Ўш вилояти ИИБдан маълум қилишларича бу сафарги ўйинни томоша қилиш учун 40 мингга яқин одам келган. Кечга яқин одамларни тарқатиб, вазиятни барқарорлаштиришга эришилди. Юз берган ҳолат бўйича милиция текширув ишларини олиб бормоқда.
Воқеадан сўнг тарқалган видеоларда даҳанаки жангнинг интернетда давом этганини кўриш мумкин. Турли ҳақорат ва низо чиқариши мумкин бўлган изоҳларнинг олдини олиш учун каналлар изоҳ қолдириш имконини чеклаб қўйдилар.
Ана шундай видеолардан бири 1,6 млн. обуначисига эга бўлган “Тез кабар” каналида эълон қилиниб, унда афтидан толаслик улоқчилардан бўлган бир йигит бўлиб ўтган воқеада бутун ўшликларни айбламасликка чақирган. Ўшликларни эса жанжал чиқарган аҳмоқлар учун кечирим сўрашга даъват қилган.
“Дўстуқ” командаси Толасга келганда биз уларга пластик шиша отиш тугул Манас Ниязовга (таниқли улоқчилардан. – таҳр.) от миндириб жўнатганмиз”, – деди у.
Бунга ўхшаш одамларни тинчликка, баҳамжиҳатликка чақирган видеолар ва изоҳлар чиқишда давом этмоқда.
Кўкбўри ўйинига қадар президент Садир Жапаров миллий от ўйинларининг бошқа турлари бўйича мусобақаларда ҳам қатнашиб, ғолибларга мукофотлар топширди. У от спортининг кўчманчи қирғиз халқининг ҳаёти ва тарихида муҳим ўрин тутишига урғу бериб, уларнинг ёш авлодда устуворлик, жасорат, кураш ва ғурур туйғуларини шакиллантиришини эътироф этди.
Тақдирнинг ҳазилими, тасодифми, жанжал бошлаган команданинг номи “Дўстуқ” (Дўстлик) бўлса, иккинчи команданинг номи “Интимақ” (Баҳамжиҳатлик) экан. Умид қиламизки, бундан кейин бундай ўйинлар чинакам Дўстлик ва Баҳамжиҳатликда, ўзаро ҳурмат муҳитида ўтади.
Оқбура, Бишкек.
Расм ва видео интернетдан олинди.
