Таниқли блогер Улуқбек Қарибек ўғли безориликда гумонланиб ҳибсга олинди

Ҳаракатлари авваллари ҳам мунозара туғдирган блогер бу сафар осонликча қутилмаса керак.

Қирғизистонлик таниқли блогер Улуқбек Қарибек ўғли 14 июл куни пойтахт Бишкекда қўлга олиниб, “безорилик” моддаси бўйича қўзғатилган жиноий иш доирасида Ўшга олиб келинди. У шаҳар Ички ишлар бошқармасининг вақтинчалик сақлаш жойида 48 соатга ҳибсга олинди.

Ўш шаҳар милицияси берган расмий маълумотга кўра, 7 июл куни Ўш вилоятлараро туғруқхонаси бош шифокори блогерга чора кўришни сўраб, тартиб посбонларига мурожаат қилган. Номаълум журналистлар туғруқхонаси биносида рухсатсиз видео суратга олиб, медикларнинг иш олиб боришларига тўсқинлик қилган.

“Тергов гуруҳи журналист Улуқбек Қарибек ўғлини у ерга борганини, туғруқхона ходимлари уни ичкарига киритмаганини аниқлаб, тушунтириш ишларини олиб борган. Ўша куни блогер икки ҳамроҳи билан туғруқхонанинг орқа эшигини синдириб, хонага киришган ва ҳеч кимнинг рухсатисиз жонлантириш бўлимига кирган”, дейилади маълумотда.

Шунингдек, блогер ва унинг ҳамроҳлари туғруқхона ходимларига бўйсунмай, уларни туртиб юборишган ва ўнга яқин энди туққан келинлардан интервью олишган. Блогернинг қилмиши туфайли мазкур туғруқхонага 37 мингга сўмга яқин ($430 атрофида) моддий зарар етгани иддао қилинмоқда.

Ушбу иш бўйича тергов давом этмоқда ва Қарибек ўғлининг шериклари ҳам сўроқ қилинмоқда.

Улуқбек Қарибек ўғлининг дўсти Қубан Садировнинг сўзларига кўра, дўстининг қайси иш бўйича қўлга олингани ҳақида аниқ маълумот йўқ, бироқ охирги марта Ўш вилоят туғруқхонасидаги муаммолар ҳақида видеолавҳа тайёрланган. 12 июл куни Улуқбек “Ўш вилоятининг тартибсиз туғруқ уйи” сарлавҳаси остида видео материалини эълон қилган. Унда туғруқхонадаги салбий шароитлар, фуқаролардан пул талаб қилиш ҳолатлари ҳақида сўз боради.

Блогер “милициянинг қонуний талабларига бўйсунмаганликда” гумон қилинмоқда. Бу ҳақда Қирғизистон Ички ишлар вазирлиги бугун, 15 июл куни бунга оид материаллар Бишкек Биринчи Май туман судига юборилганини маълум қилди.

ИИВ маълумотларига кўра, 2023 йилнинг 10 июлида Улуқбек Қарибек ўғли тасвирга олиш гуруҳи билан Соғлиқни сақлаш вазирлиги биносига кириб келган. Хавфсизлик хизмати уларни вазирликдан чиқиб кетишни сўраганида, улар ОАВ тўғрисидаги қонунга асосланиб ҳаракат қилаётганини айтган ва қўполлик қилиб, жамоат тартибини бузган.

Бу факт Биринчи Май тумани ички ишлар бўлимининг маълумотларни ҳисобга олиш электрон журналида қайд этилиб, текшириш ишлари олиб борилмоқда. 14 июл куни Улуқбек Қарибек ўғли Жиноят кодексининг “Ички ишлар органи ходимининг қонуний талабига бўйсунмаслик” моддаси асосида департаментнинг жамоат хавфсизлиги хизмати идорасига олиб кетилган ва баённома тўлдирилгандан сўнг қўйиб юборилган.

Маълумотларда унинг Соғлиқни сақлаш вазирлиги идорасига қайси масала юзасидан ташриф буюргани ҳақида айтилмаган.

Улуқбек Қарипбек ўғли ўзининг мунозарага сабаб бўлган ҳатти-ҳаракатлари билан машхур. Жумладан биз унинг Ўш шаҳридаги кафелардан бирига рухсатсиз кириб, унинг ходимлари билан жанжаллашгани ҳақида ёзгандик. Ушбу воқеа ва блогернинг материали чиққанидан кейин кафедаги қонунбузарликлар тасдиқланиб, муассаса ёпилган эди.

Март ойида блогер яна бир ҳаракати билан баҳс яратди. Ўшанда Қирғизистон Вазирлар маҳкамаси раисининг ўринбосари Эдил Байсалов, Улуқбек Қарибек ўғлининг болалар боғчасига кириб келаётган видеосини танқид қилиб, бундай фаолият ортида сиёсий мартаба орттириш мақсади турибди, деган фикрни билдирган эди ва блогер юу ҳаракати учун интизомга чақирилишини қўшимча қилган.

Улуқбек Қарибек ўғли Байсаловга Фейсбук орқали жавоб қайтариб, “агар вазирликлар ва маҳаллий ҳокимият ходимлари ўз ишини яхши бажарсалар, минглаб одамлар блогер ва журналистларга мурожаат қилмас эди”, деб ёзган.

Улуқбек Қарибек ўғлининг Ютуб канали 500 000дан ортиқ обуначига эга. Унда давлат муассасаларидаги порахўрлик ҳолатлари ва хизмат кўрсатиш сифати ҳақида видеороликлар чоп этилади.

Оқбура, Бишкек.

Расм интернетдан олинди