Бекор айтибсиз! Россияга ҳарбий ёрдам ҳам бўлмайди, концертлар ҳам

Ҳарбий блокларда иштирок этмаслик ҳақидаги Ўзбекистон ҳарбий доктринаси ўзгармайди.

Ўзбекистон Мудофаа вазирлиги Ўзбекистоннинг Россияга ҳарбий ёрдам бериши мумкинлигига доир ижтимоий тармоқларда тарқалган гапларни рад этди.

Вазирликнинг ахборот ва оммавий коммуникациялар департаменти масалага вазирликнинг расмий муносабат билдирар экан, гўёки ўзбекистонлик ҳарбийларнинг Россияга ёрдам бериш учун ҳарбий полигонда шай бўлиб тургани, аммо вазият ўзгаргани туфайли Россияга бормай қолгани ҳақидаги хабарларнинг ҳақиқатга тўғри келмаслигини таъкидлади.

Мудофаа вазирлиги маҳаллий нашрлар ва блогерларни воқеаларни нотўғри талқин қилишдан тийилишга чақирган ва ижтимоий тармоқларда тарқалган видеода шу йилнинг март ойида Чирчиқ шаҳрида бўлиб ўтган Ватанпарварлик фестивалига жалб этилган техникалар акс этганини билдирган.

Вазирлик Ўзбекистоннинг Мудофаа доктринаси мамлакатнинг “бошқа давлатларнинг ички ишларига аралашмаслик”, “ҳарбий-сиёсий блокларда иштирок этмаслик, ҳарбий-сиёсий блокка айлантирилган ҳолатда ҳар қандай давлатлараро ташкилотдан чиқиш ҳуқуқини сақлаб қолиш” каби тамойилларга асосланганини эслатган.

Ўзбекистонлик ҳарбийларнинг Россияга йўлланиши мумкинлиги ҳақидаги хабарлар россиялик олигарх Евгений Пригожинга тегишли “Вагнер” хусусий ҳарбий ширкати кўтарган қуролли исён бошлангандан сўнг тарқала бошлаган.

Эслатиб ўтамиз, Россия Мудофаа вазирлиги раҳбарияти билан чиқиша олмай қолган Пригожин гўёки уларни жазолаш мақсадида ўз аскарларини Москвага йўналтирган ва тез орада Ростов-на-Дону, Воронеж ва Липецк шаҳарларини эгаллаган. Москвага атиги 200 километр қолганда Пригожин юриш тўхтагани ва унинг аскарлари ҳарбий лагерларга қайтаётганини эълон қилган.

Кейин маълум бўлишича, бунга Беларус президенти Александр Лукашенко ўртага тушиб, Пригожинни Москвага ҳужум қилиш ниятидан қайтаргани сабаб бўлган. Бугун қаердалиги ноъмалум бўлган Пригожин навбатдаги мурожаати билан чиқиб, унинг мақсади ҳокимиятни қўлга олиш эмас, балки норозилик акцияси бўлганини айтди.

Бунгача Россия президенти Путин бунгача ўзининг дўсти бўлган Пригожиннинг исмини атамаган ҳолда исёнчиларни “орқадан пичоқ урган ҳиёнатчи, сотқин”, деб атаган. Лекин юришни тўхтатиш эвазига уларга ўз лагерига ёки уйларига қайтиш ихтиёри берилган. Пригожиннинг эса жазога тортилмаган ҳолда Беларус ҳудудига ўтиб кетиши кафолатланган.

Марказий Осиё давлатлари, жумладан Ўзбекистонда ҳам Россия билан иқтисодий ҳамкорликни давом эттириш лозимлигини инкор этмаган ҳолда унинг Украинага қарши олиб бораётган босқинчилик урушини қўлламаслик талаблари тобора кенгроқ миқёсда янграмоқда. Шу муносабат билан Россиянинг бу урушни қўллаган турли санъат ва маданият арбобларининг бу ўлкаларга келиш ниятлари одамларда норозилик туғдирмоқда.

Куни-кеча россиялик машҳур қўшиқчи Григорий Лепснинг шу йил 23 октябрида Тошкентда ўтиши режалаштирилган концерти бекор қилингани маълум бўлди. Бунга ижтимоий тармоқларда бир гуруҳ ўзбекистонликларнинг шу ҳақдаги талаблари сабаб бўлгани айтилмоқда.

Жумладан блогер Мирзо Зоминий қўшиқчи Лепснинг Украинадаги урушни қўллаётганини айтиб, ўзининг Telegram-каналида #LepsKerakmas хэштеги остида унга қарши кампания бошлаган. Унинг ёзишича, Лепснинг Тошкентдаги концерти учун чипталар 150 000 сўмдан 4 миллион сўмга (10 – 260 АҚШ доллари) белгиланган экан.
«Ўзбекистон сенларнинг ота-бобонгдан қолган мулк ёки жангчиларингни мукофотлаш учун пул йиғиладиган жой эмас… Ор-номуси бор ўзбекистонликлар, максимум бўлишинг. Қонхўр машина ёқилғи билан таъминланишига йўл қўйманг“, деб ёзган блогер.
Ижтимоий тармоқлардаги бу қаршилик кампанияси бошлангандан кейин бир неча кун ўтиб Iticket.uz сайтидан Григорий Лепс концертига оид афиша олиб ташланган. Лепснинг концерти сал аввалроқ Қозоғистонда ҳам бекор қилинган. Россия энг яқин сиёсий ва иқтисодий ҳамкор ҳисобланган Қирғизистонда ҳам бунгача бир қатор ана шундай концерт гастроллари бекор қилинган эди.
Эслатиб ўтамиз, россиялик хонандалар Григорий Лепс ва Николай Басков бир бир ойча олдин Украина Қуролли кучларининг битта танкини йўқ қилган ҳар бир кишига бир миллион рублдан мукофот беришларини эълон қилишган эди.

Лепс билан бир қаторда Кремль ғояларини мадҳ этувчи хонанда Ирина Дубцованинг Тошкентда бўлиб ўтиши керак бўлган концерти ҳам бекор қилингани айтилмоқда.

Бугунги кунда Россия эстрада, кино, театр санъати ва спорт юлдузларининг бир қисми Украинадаги урушга қарши чиққанлари боис қувғинга олиниб, ҳатто жиноий жавобгарликка тортилаётган бўлса, бошқа бир гуруҳи мамлакат ташқарисида бойкот қилинмоқда. Масалан, урушнинг дастлабки ойлариданоқ уни танқид қилган машҳур қизиқчи Максим Галкин мамлакатни тарк этишга мажбур бўлган. Унинг ортидан рафиқаси Алла Пугачёва ҳам Россиядан чиқиб кетиб, Исроилда яшаб туришга мажбур бўлишди. Аксинча, Олег Газманов, Николай Расторгуев каби дунё миқёсида танилган эстрада юлдузлари Россия ва бошқа давлатларда бир қатор мухлисларининг олқишларига сазовор бўлганлари ҳолда яна катта бир кўпчиликнинг нафратига дучор бўлишмоқда.

Оқбура, Бишкек.

Расм интернетдан олинди