Референдумдан сайловга: Ўзбекистонда президент сайлови компанияси бошланди
Референдум натижаларига кўра, энди Ўзбекистонда президент қайта сайланиши керак.
Ўзбекистон Марказий сайлов комиссияси (МСК) Ўзбекистон президентлиги учун сайлов кампаниясига 10 майдан старт берилганини маълум қилди. Сайловнинг ўзи шу йилнинг 9 июль куни бўлиб ўтади.
МСК қарорига кўра, сайловда иштирок этишни истаган сиёсий партиялар ўз ваколатли вакилларини рўйхатга олиш учун 13 майгача сайлов комиссиясига мурожаат қилишлари керак. Сайловда иштирок этиш учун ҳужжатларни эса 15 майгача МСКга юборишлари лозим.
Шундан сўнг 1 июнгача партиялар президентликка ўз номзодларини кўрсатишлари мумкин. МСК президентликка номзодларни 6 июнгача рўйхатга олади ва бу ҳақда расмий эълон қилингач, сайлов компаниясига старт берилади.
Президентликка асосий номзод бўлган 66 ёшли Шавкат Мирзиёев илк бор 2016 йилда биринчи президент Ислом Каримовдан кейин президентликка сайланган эди. 2021-йилда иккинчи бор беш йиллик муддатга президентликка сайланган.
Яқинда ўзгартирилган конституцияга кўра, президентлик муддати 7 йилгача узайтирилди. Ва бу муддатга президент икки марта сайланиши мумкин. Агар Мирзиёев муддатидан ташқари президентлик сайловларида ғалаба қозонса, у икки сайловда қатнашиб, 14 йил давлатни бошқариш ҳуқуқини қўлга киритиши мумкин. Шу сабабдан яқинда ўтказилган референдумнинг асосий сабаби ана шундай имкон яратишдан иборат деб таҳмин қилганлар кўп бўлди.
Эслатиб ўтамиз, Ўзбекистоннинг биринчи президенти Ислом Каримов конституцияга ўзгартиришлар киритиш йўли билан тўрт марта президент этиб сайланган. Бир марта референдум йўли билан президентлик муддатини узайтирган.
Шундай қилиб, Ислом Каримов Ўзбекистонни 27 йил бошқарди ва 2016 йилда 78 ёшида вафот этди.
Оқбура, Бишкек.
Расм интернетдан олинди
