Ўшда ўзбек жамоатчилигининг собиқ фаоли Кароматхон Абдуллаева қўлга олинди (янгиланди)
Июнь воқеалари бўйича сиртдан судланган ёши улуғ аёл Ўшга ўз ихтиёри билан келган.
Бугун, 24 апрелда, 2010 йил июнь воқеалари ташкилотчиларидан бири сифатида айбланиб, узоқ муддатга судланган Кароматхон Абдуллаева қўлга олинди, деб хабар қилди Ўш ИИБ матбуот хизмати.
Хабарда айтилишича, Абдуллаева милиция ходимлари Миллий хавфсизлик давлат қўмитаси ходимлари билан биргаликда ўтказган махсус амалиёт натижасида қўлга олинган. Амалиёт тафсилотлари кейин берилиши ҳақида айтилган хабарда бошқа маълумот йўқ.
Ички ишлар бошқармаси Абдуллаеванинг 2010 йилги қонли воқеаларнинг фаол ташкилотчиларидан бири сифатидаги айблов билан 2014 йилда сиртдан 16 йилга озодликдан маҳрум этилгани ва мамлакатдан ташқарида бўлгани сабабли Интерпол тизимида қидирувга берилганини айтади.
Аммо Кароматхон Абдуллаева ва унинг яқинлари бу айбловларнинг асоссиз уйдирма эканини айтиб, иложсизликдан мамлакатни тарк этишга мажбур бўлганини айтиб келади. Июнь воқеаларидан кейин анча вақтгача бу воқеалар ва расмий ҳукуматнинг унга берган баҳоси, ноҳақ қамалган фуқаролар ҳақида баёнотлар бериб келган.
Бизнинг манбаларимиз берган маълумотга кўра, қидирувда юрган Кароматхон Абдуллаева 22 апрел куни Ўшга ўз ихтиёри билан келишга қарор қилган. Чунки, ёши 73га бориб қолган аёл шу кунгача ўзини асло айбдор ҳис қилмаган ва бу ҳақда доимий равишда айтиб келган.
Машъум июн воқеалари бошланганда Абдуллаева ҳатто Қирғизистонда ҳам бўлган эмас. У 9 июн куни Туркиядаги бизнес ишлари важидан Тошкент орқали Истанбулга учиб кетган ва Ўшдаги аҳволни эшитиб, 12 июнь куни Тошкентга учиб келган. Ўшга киришга қилган ҳаракати натижа бермаган, чунки чегаралар ёпиқ бўлган.
Сўнгра Ўшдаги танишлари ва ҳамкасблари унга шаҳарда фожиали воқеалар, қонунсизликлар бўлаётганини айтишиб, унга Ўшга келмай туришни маслаҳат беришган. Шу аснода орадан 12 йилдан ортиқ вақт ўтди.
Юрт соғинчида Ўшга келаётган Кароматхон опага «Дўстук» (Дўстлик) чегара постида унинг қидирувда эканини маълум қилишган. У ерга тегишли ҳуқуқ-тартибот органлари вакиллари чақирилган. Чегара постида 5 соатча ушлаб турилгач, Абдуллаевани Ўшга олиб кетишган ва ҳибсга олишган.
Бизга маълум бўлишича, Кароматхон Абдуллаева бугун суд қарорида белгиланган жазони ўташ учун қамоқхонага жўнатилган.
Каромат Абдуллаева узоқ йиллар давомида Қирғизистон аёллар Конгресси президенти ўринбосари ва Ўзбек миллий-маданий маркази фаоли сифатида фаолият кўрсатиб, қирғиз ҳукумати раҳбарияти томонидан турли мукофотлар билан тақдирланган.
Эслатиб ўтамиз, 2010 йилдаги апрель инқилоби деб аталмиш давлат тўнтаришидан кейин, мамлакатда бошқарувни Муваққат ҳукумат ўз қўлига олган. Нўноқ бошқарув ва сиёсий курашлар натижасида фитна уюштирилиб, ўша йилнинг ёзида Қирғизистон жанубида миллатлараро можаро келтириб чиқарилган.
Расмий хабарларга кўра қирғизлар ва ўзбеклар иштирокидаги жанжалда 400 дан ортиқ одам ҳалок бўлган. Минглаб одамлар яраланиб, Ўшдаги минглаб уйлар ва ишхоналар ва бошқа мулк таланиб, уларга ўт қўйилган. Олтмишга яқин одам бедарак йўқолган бўлиб, улардан 15 нафари ҳалигача топилмаган.
Оқбура, Бишкек.
Расм интернетдан олинди
