Ёлғоннинг умри қисқа: Россияда таниқли ҳарбий журналист портлатиб юборилди
Марҳум Россиянинг Украинага қарши уруши бўйича энг фаол пропагандачилардан бири эди.
Россия оммавий ахборот воситаларининг хабарига кўра, кеча, 2 апрелда Санк-Петербург шаҳрида россиялик журналист Владлен Татарский унга қарши уюштирилган портлашда ҳалок бўлган. Портлаш оқибатида 30 нафар одам жароҳат олиб, 24 киши касалхонага етказилган, бир неча кишининг аҳволи оғир экани айтилмоқда.
Бу террорчилик шаҳардаги кафелардан бирида журналистнинг “Ҳарбий мухбир деган касб бор” номли доимий равишда ўтказилиб турадиган тадбири вақтида амалга оширилган. Тадбирда юзга яқин одам иштирок этаётган эди.
Дастлабки хулосаларга кўра, портлаш журналистга ўша пайтда совға қилинган бюст, ҳайкалча ёрдамида амалга оширилган. Учрашув давомида ўзини рассом-ҳайкалтарош Настя деб таништирган қиз Татарскийга (асли исми-шарифи Максим Фомин) совға олиб келгани ва уни кийиниш жойида қолдирганини айтган. Унга рухсат берилгач, қиз бориб қутига солинган совғасини олиб келган. Олтин рангга бўялган бюстда журналистнинг ўзи тасвирланган бўлиб, совға унга ёққан.
“Менинг чиройлилигимни қаранг, бунинг устига олтин ҳам эканман”, дея миннатдорчилигини билдирган журналист. Сўнгра зао ичидаги ўрнига кетаётган Настяга ўзининг ёнига ўтиришни таклиф қилган. Қиз уялишини айтиб унамаган, лекин барибир журналистдан нарироққа бориб ўтирган. Гувоҳларнинг айтишларича, Настя портлашгача ўтирган жойидан кетмаган, лекин у портлашдан кейин топилмаган.
Тез орада қизнинг асли исми Дарья экани ва бунгача бир нечта мухолафатчи кучларнинг митингларида иштирок этгани аниқланди, ҳозирда уни 200 оператив ходим ва 500 атрофида бошқа полиция ходимлари қидиришмоқда. Қизнинг уйида тинтув ўтказишиб, у ердан бир катта ёшдаги (Дарьянинг онаси деб тахмин қилинаётган) аёлни олиб чиқиб кетишган.
Владлен Татарский журналист бўлсада, Донбассда россияпараст кучлар сафида Украинага қарши урушда шахсан қўлида қурол билан жанг қилгани маълум. Шу вақтнинг ўзида Россиянинг Украинадаги уруши ҳақида фикрларини омма билан ўртоқлашиб келган. Украинада Татарскийни Кремль тарғиботчиларидан бири деб билишади.
“Фонтанка” нашрининг ёзишича, портлаш юз берган кафе машхур “Вагнер” хусусий ҳарбий компания асосчиси ва эгаси Евгений Пригожинга тегишли бўлган. Дам олиш кунлари бу ерда «Сайбер Z Фронт» номли мунозара клуби йиғилиб, Украинадаги уруш муҳокама қилиниб турган.
Бу портлаш Россия пропагандасига қарши урушнинг янги босқичга ўтаётганидан дарак беради, деса бўлади. Бугунги кунда Москванинг асосий пропагандачилари бўлган Владимир Соловьёв, Ольга Скабеева, Маргарита Симоньян ва унинг эри Тигран Кеосаян кабиларга қарши Украинада бир нечта каналлар ишлайди ва уларнинг айтганларини далиллар асосида фош этиш, уларга қарши даъволар қилиш билан шуғулланишади.
Номи аталган пропагандачилар ва уларнинг ўндан ортиқ касбдошларини Кремль қаттиқ қўллаб-қувватлайди, бугунги кунда уларнинг ҳам бири бир неча ўнлаб миллион рубль бойликка, Россия ва чет элларда миллионлаб доллар турадиган кўчмас мулк ва турли бизнесларга эга. Эвазига улар Кремлнинг ғоялари ва фикрларини ёлғон-яшиқ ёрдамида оммага етказиш билан шуғулланишади. Уларнинг деярли ҳаммаси Владимир Путин билан шахсан таниш.
Шу вақтнинг ўзида АҚШдаги машҳур The Wall Street Journal нашри журналисти Эван Гершкович Россия қамоқхонасида ўтирибди. Россия томоннинг даъво қилишича, у ўз касбини бажариш ниқоби остида АҚШ фойдасига жосуслик қилиш билан шуғалланган.
Кеча шу муносабат билан АҚШ давлат котиби Энтони Блинкен Россия ташқи ишлар вазири Сергей Лавровга қўнғироқ қилган.
Сергей Лавров АҚШни “Россиянинг қонунчилиги ва халқаро мажбуриятлари асосида қабул қилинган қарорларини ҳурмат қилишга” чақирган ва Вашингтон расмийлари ҳамда Ғарб оммавий ахборот воситаларининг бу ишга сиёсий тус бериш ниятида шов-шув кўтаришига йўл қўйилмаслиги лозимлигини айтган.
Лавров Блинкенга Гершковичнинг “журналистлик мақоми ниқоби остида давлат сирини ташкил этувчи маълумотларни тўплаш, махфий маълумотларни олишга уринаётган пайтида жиноят устида қўлга олинганини” айтган.
Блинкен буни “қабул қилиб бўлмайдиган ҳибсга олиш” деб атаркан, бу муносабат билан “АҚШнинг жиддий хавотирини” билдирди ва зудлик билан журналистни озод қилишга чақирди.
Хуллас, жуда масълиятли ва жамият учун сув ва ҳаводек зарур бўлган маълумотни топиб оммага етказиб беришдек вазифасини ёлғончилик ёки бошқа “касб”га айлантиришнинг оқибати доимо яхшиликка олиб келмаган. Халқимизда “Ёлғоннинг умри қисқа”, деган гап бор, бу гап ёлғончининг ўзига ҳам тегишли эканини ҳаёт кўрсатмоқда.
Албатта, бу гаплар дунёнинг турли бурчакларида ҳақиқат излаб, уни очиққа чиқариш мақсадида жонини қурбон қилаётган, ўз касбининг чинакам фидойиси бўлган журналистларга тегишли эмас. Афсуски, ҳар йили ўнлаб журналистлар ўз касбини адо этиш пайтида жиноят олами, мафия ва коррупцияга ботган ҳукуматлар томонидан ўлдирилмоқда ёки қамоққа ташланмоқда.
Оқбура, Бишкек.
Расм интернетдан олинди
