Муштумзўр депутатлик мандатини топширди. Ўрнига дарров талабгор чиқа қолди
Икки ҳафта аввал оммавий муштлашувда қатнашган халқ вакили сайловчиларидан узр сўрашни унутмаган.
Қирғизистон парламенти депутати Жанибек Абиров, бугун 27 март куни депутатлик мандатини топшириш ҳақида ариза берди. Шу бугуноқ Қирғизистон Марказий сайлов комиссияси бу аризани қаноатлантирган. Бу ҳақда комиссиянинг матбуот хизмати хабар берди.
Шу вақтнинг ўзида Абировнинг ўзи ҳам ариза бергани ҳақида Facebookдаги саҳифасида хабар берган. У Бишкекдаги ресторанлардан бирида муштлашувда иштирок этгани ва бу нохуш воқеалардан кейин унинг депутат бўлишга ҳуқуқи йўқлигини баён этган.
Икки ҳафта олдин ижтимоий тармоқларда Бишкекдаги ресторанлардан бирининг ёнида юз берган муштлашув акс этган видео тарқалган эди. Видео муаллифлари даҳанаки жангда парламент депутати Жанибек Абиров иштирок этганини айтишган.
Эртаси куни, 12 мартда муштлашувда жабрланган одам ариза билан милицияга мурожаат қилган. Икки кун ўтиб, Абиров муштлашувга қатнашганини тасдиқлаб, бунинг учун “қонунга мувофиқ жавоб беришга тайёрлигини” айтган.
Ўз навбатида милиция бу муштлашувда гумон қилинган икки шахсни қўлга олган ва уларга қарши Жиноят кодексининг “Безорилик” моддаси билан жиноий иш қўзғаган. Жабрланган шахсга тиббий ёрдам кўрсатилмоқда.
Қонунга кўра, депутатнинг аризаси қаноатлантирилгач, республика президенти икки ой ичида ушбу бир мандатли сайлов округида (пойтахтнинг Биринчи Май сайлов округи) янги сайловлар ўтказиш ҳақида қарор қабул қилиши лозим.
Бу хабар тарқалиши билан ҳозирда Бишкекдаги 1-сон тергов изоляторида ўтирган сиёсатчи Равшан Жээнбеков ушбу округдан сайловда иштирок этиш ниятини маълум қилган. Бу ҳақда маҳбус ўзининг Фейсбукдаги саҳифасида ёзган.
Равшан Жээнбеков 2020 йилнинг октябрида Бишкекдаги оммавий тартибсизликларни уюштиришда иштирок этганликда айбланиб, қамалган. Қонунга кўра, жиноий иш қилгани исботлангунга қадар шахс сайловда иштирок этиш ҳуқуқига эга.
Жээнбеков айнан шу округда аввал ҳам, ҳибсда бўла туриб сайловда иштирок этган. Бунинг устига 2021 йили ўтган ўша сайловда президент Садир Жапаровнинг унинг учун овоз бергани маълум бўлган. Шунга кўра, унинг сайланган депутат сифатида қамоқда чиқиб кетиши эҳтимоллиги анча юқори.
Оқбура, Бишкек.
Расм интернетдан олинди
