Яхшиликка бўлсин: Қирғизистон ва Ўзбекистон Россия дўстлари қаторига киритилди
Буюк Британиянинг The Economist журнали Россияга яқин 12 давлатдан иборат рўйхат тузган.
Британиядаги нуфузли нашр дунё давлатларининг Россия билан дипломатик, ҳарбий, энергетик ва иқтисодий алоқаларини ўрганиб чиққан ҳолда бу давлатнинг бугунги кундаги геосиёсий иттифоқчилари индексини тузган. Бу рўйхатда рўйхатда Қирғизистонга саккизинчи ва Ўзбекистонга ўнинчи ўринлар берилган.
The Economist экспертларининг таҳлилига кўра, дунё давлатларининг асосий қисми қаттиқ санкциялар киритиб, иқтисодиёти оғир кунларни бошидан кечираётган бугунги Россияга геосиёсий жиҳатдан энг яқин бўлган давлат деб Беларус (11 балл) тан олинган.
Маълумки, Россия ва Беларус иттифоқдош давлатлар бўлиб, Беларус раҳбарияти Россияни ҳар бир масалада яқиндан қўллаб келмоқда. Жумладан, Украинадаги урушда бевосита иштирок этмаса ҳам, бу масалада Москванинг мутлоқ тарафдори эканини кўрсатиб келяпти. Шу сабабдан Россия билан бир қаторда халқаро иқтисодий санкциялар исканжасида қолган.
Москва билан алоқаларининг яқинлиги бўйича Арманистон (9 балл) ва Қирғизистон (8 балл) иккинчи ва учинчи ўринлардан жой олишган. Марказий Осиё давлатларидан Тожикистон ва Қозоғистон Эрон билан биргаликда 6 баллдан олишиб, кейинги ўринларда боришмоқда.
Бу давлатлардан кейин Сурия, Хитой, Венесуэла (5 баллдан) ҳамда 4 балл билан Никарагуа, Ҳиндистон, ва Ўзбекистон (рўйхатнинг энг охирида) Россиянинг дўстлари сифатида эътироф этилган.
Нашр ўзи эълон қилган нашрни “Путиннинг дўстлари” деб ҳам номлагани айтилади.
Ўзбекистоннинг бу рўйхатнинг сўнгида бўлса ҳам унга киритилганига сабаб – БМТ Бош Ассамблеясида Россия қарши ишлаб чиқилган резолюцияларда овоз бермагани, аммо Россияга тарафдор ҳам бўлмагани, Россияга қурол етказиб беришда иштирок этмагани, Коллектив хавфсизлик шартномаси давлари ташкилотига (КХШТ) аъзоси эмаслиги, ўз ҳудудида рус ҳарбий қисмларини жойлаштирмагани ва 2022 йил февралидан, яъни Украинадаги уруш бошлангандан буён Россия билан қўшма ҳарбий машғулотлар ўтказмагани ҳисобга олинган.
Ўзбекистон президенти Шавкат Мирзиёев ўзининг яқинда қилган нутқларидан бирида, бугунги халқаро аҳволни оғирлигини эътироф этиб, дунёнинг йирик давлатлари Ўзбекистонга ҳам “ҳадеб нейтрал туравермасдан ким тарафда эканини аниқлаб олишга қатъий даъват этаётганликларини” айтган.
Бу ҳолатда Ўзбекистон ким томонда бўлиши керак, деган саволни ташлар экан, унга шундай жавоб берган: “Бу оғир саволга жавоб битта. “Мен бир томонман, миллатим, халқим, буюк Ўзбекистонимнинг манфаати учун ўлишга ҳам тайёрман”, деб жавоб бераман”.
The Economist ўзининг бу масалага бағишланган мақоласида келтирилган индекс юқорида тилга олинган давлатларнинг дипломатик позициясидаги ўзига хосликларни акс эттирмаслигини тан олиб, бу давлатларнинг Россияга нисбатан қандай позицияда эканигагина баҳо беришини қайд этган. Нашр шунигдек ушбу давлатлар ўз позицияларини мажбурликдан танланган бўлишлари эҳтимоли ҳам борлигини эътироф этган.
Оқбура, Бишкек.
Расм интернетдан олинди
