Озми, кўпми? Қирғизистоннинг олтин заҳираси 47 тоннага яқинлашди
Пулга чаққанда биргина Илон Маскнинг бойлиги бу олтин заҳирасидан етмиш баробар кўп бўларкан.
Қирғизистон Миллий банкининг расмий вакили Аида Қарабаеванинг 28 февраль куни Бишкекда ўтган матбуот анжуманида маълум қилишича, ҳозир Миллий банк ихтиёрида 46,7 тонна олтин бор. Унинг таъкидлашича, бу Қирғизистонда 2021 йилдан бери қазиб олиниб, ишлаб чиқарилган, Миллий банк томонидан сотиб олинган олтинлардир.
Қарабаеванинг сўзларига кўра, Миллий банкнинг халқаро олтин-валюта захирасида 16 тонна олтин бўлиб, унинг қиймати 87,3 миллиард қирғиз сўмига (1 млрд. АҚШ доллари атрофида) тенг. Бундан ташқари, захирадаги нақд олтиннинг қиймати 138,5 миллиард сўмга тенг. Умумий ҳисобда бу заҳираларнинг қиймати 2,6 млрд. АҚШ долларига тенг.
Яқинда Қирғизистон Вазирлар маҳкамасининг раиси Ақилбек Жапаров «Қабар» миллий ахборот агентлиги билан суҳбатда «Қумтўр» олтин кони ва ширкати Қирғизистон тасарруфига ўтгандан буёнги икки йил ичида у ердан 45 тонна олтин ва 8 тонна кумуш олинганини маълум қилган эди.
Бу нақадар қувончли кўриниш бўлмасин, дилни хира қилиб турган жиддий бир ҳолат бор. Яъни, мамлакатнинг мустақилликка эришган йилдан тортиб олган қарзлари йиғилиб келиб, жорий йилнинг бошида 5,5 млрд. долларни ташкил этди. Бу Қирғизистоннинг янги туғилган чақалоқдан бошлаб ҳар бир фуқаросига 785 доллардан қарз тўғри келади, деган гап. Олинган қарзларни узиш даври айни шу йилларга тўғри келяпти. Жумладан, жорий йилнинг январ ойида ташқи қарзни тўлаш учун 2 миллиард сўм (салкам 23 млн. доллар) ажратишга тўғри келди.
Шу вақтнинг ўзида машҳур Tesla ва SpaceX ширкатлари асосчиси Илон Маскнинг дунёнинг энг бой одамлари рўйхатида яна пешқадамлик қила бошлагани ҳақида хабар тарқалди. Bloomberg нашрининг билдиришича, ҳозирда унинг бойлиги 187 миллиард доллар деб баҳоланмоқда.
Бунгача биринчиликда келаётган Louis Vuitton Moët Hennessy ширкати раҳбари, француз Бернар Арнонинг бойлиги 185 миллиард долларга тенг бўлиб, энг бой одамлар рўйхатининг иккинчи поғонасига тушиб қолди.
Ширкатларининг акциялари тушиб кетиши оқибатида 2022 йил декабрида Илон Маск бирданига 200 миллиард долларини йўқотган. Бунгача ҳея кимда бундай улкан йўқотиш бўлмаганини Bloomberg ёзган эди. Бунгача Маск 340 миллиард доллардан кўпроқ бойликка эга эди.
Қирғизистон аҳолиси охирги 13 йил ичида 1,5 миллион кишига ўсиб, ўтган йилнинг октябрида мамлакатнинг етти миллионинчи фуқароси туғилгани эълон қилинган эди. Улардан икки ярим миллионга яқини шаҳарда яшаса, қолган 4,5 миллиони қишлоқ жойларда яшайди.
Оқбура, Бишкек.
Расм интернетдан олинди
