Қурманбек Бакиев: Апрель ва июнь воқеаларида менинг айбим йўқ
Собиқ президентларнинг Дубайдаги учрашуви бўйича изоҳ бермаган битта Ўтунбаева қолди.
Бугунги кунда Беларусдан бошпана топибгина қолмай, у ерда катта лавозимларда ишлаб, ўз бизнесига эга бўлган собиқ президент Қурманбек Бакиев Қирғизистоннинг иккинчи президенти. У мамлакатдаги биринчи тўнтаришдан сўнг Москвага қочишга мажбур бўлган тўнғич президент Асқар Ақаевдан сўнг, 2005-2010 йилларда давлатни бошқарган. 2010 йилнинг апрелидаги навбатдаги давлат тўнтаришидан сўнг ватанини тарк этиб, Беларус пойтахти Минскдан бошпана топган.
Собиқ президент ўзининг Фейсбукдаги саҳифасида эълон қилган суҳбатида айтишича, у Қирғизистон собиқ президентларининг жорий йилнинг 17 февралида Дубай шаҳрида ўтган учрашувини ижобий баҳолайди ва ҳозирги президент Садир Жапаровнинг ўзига ва бу ташаббусига юқори баҳо берган.
“…Нафақат бизнинг давлатимиз, балки бутун дунё учун мураккаб бўлиб турган бир даврда у жамиятни бирдамликка чақирмоқчи бўляпти, – деган Бакиев журналистнинг саволига жавоб бераркан. – Садир Жапаров бу учрашувдан шахсий манфаатини кўзламаган. У ҳамма ишларда собиқ президентларни айблаб, популизм йўлини танлаши мумкин эди. Садир Жапаров енгил бўлмаган, лекин тўғри йўлни танлади. Бу унинг инсон сифатида ҳам, сиёсатчи сифатида ҳам ўсиб етилганини кўрсатади”.
Бакиев 2010 йилнинг апрел ва июн ойидаги қонли воқеаларга тўхталар экан, бу воқеаларда ўзининг айби йўқлигини даъво қилади.
“Мен ҳозир 2010 йилнинг апрелида ва кейинчалик июн ойида ҳалок бўлганларнинг ўлимида ким айбдор эканини таҳлил қилмоқчи эмасман. Лекин бу ерда менинг айбим йўқ. Мен бу масалалар бўйича терговда ва судда иштирок этишга тайёр эканимни аввал ҳам айтганман”, – деган Бакиев бу масала бўйича бошқа саволларга жавоб беришдан бош тортган.
Эслатиб ўтамиз, бунгача Дубайда бўлиб ўтган учрашув иштирокчиларидан Садир Жапаровнинг ўзи, собиқ президентлардан Асқар Ақаев, Алмазбек Атамбаев, Сўўрўнбай Жээнбековлар бу ҳақда ўз фикрларини эълон қилишган эди.
Биринчи бўлиб овоз берган Алмазбек Атамбаев бу учрашувда бошқа собиқ президентларнинг ҳам бўлиши унинг учун кутилмаган ҳол бўлганини айтиб, норозилигини билдирган ва Қурманбек Бакиевни кўргач, у ердан “инглизчасига хайрлашиб” кетиб қолганини айтган.
Журналистнинг бу ҳақдаги саволига жавоб берар экан, Бакиев ҳамма собиқ президентларнинг бир жойга йиғилиши бошқалар қатори унинг учун кутилмаган воқеа бўлганини, лекин ҳамманинг “учрашув охиригача ўтириб, еб-ичганини” айтган.
“Атамбаевга сўз беришганда у ҳам Садир Жапаровнинг ташаббусини қўллаб-қувватлади. Лекин бир нечта рюмкадан кейин у ўз сўзларини назорат қила олмай қолди. Мен унга бу ҳақда секингина айтганимдан кейин у ҳожатхонага боришини айтиб чиқиб кетди ва бошқа қайтиб келмади”, – деган Қурманбек Бакиев.
Ўзининг бошига етган “ўткир” тили ва ичкиликка мойиллиги билан маълум бўлган Атамбаев бу учрашувни изоҳлар экан, мамлакат бирлигини таъминлаш ва Қурманбек Бакиевни Қирғизистонга олиб келиш – мутлақо бошқа-бошқа нарсалар эканини айтган. Унинг фикрича, бу учрашувни ўтказишдан мақсад – айнан Бакиевни юртига қайтариш бўлган.
Собиқ президентлардан биргина Бакиев бугун юртига келолмайди. Суд қарори билан у 2010 йилнинг апрел ва июн ойидаги воқеалар бўйича айбланиб, 24 йилга озодликдан маҳрум қилинган ва мол-мулки мусодара қилинган.
Агар юқорида айтилган воқеалар бўйича тергов янгиланиб, суриштирилса, айнан Атамбаев кўпроқ айбдор бўлиб чиқиши мумкин. Чунки айнан унинг ўзи бугунги кунгача расман “инқилоб” деб юритиладиган 2005 ва 2010 йилдаги давлат тўнтаришларининг иккаласини ҳам мен амалга оширганман, деб мақтанган жойи бор.
Қатор айбловлар билан жавобгарликка тортилган ва биринчи иш бўйича 11 йил қамоқ жазосига ҳукм қилинган Атамбаев яқинда кутилмаганда суд қарори билан қамоқдан чиқарилиб, даволангани чет элга кетган. Дубайдаги учрашувда у йўл-йўлакай иштирок этиб, ҳозирда Испанияда даволанмоқда.
Шундай қилиб, Дубайдаги учрашув иштирокчиларидан биргина Рўза Ўтунбаева бу ҳақда ошкора гапиргани йўқ. У Бакиев лавозимидан қувилгач, 2010-11 йилларда мамлакатни вақтинчалик бошқарган.
Оқбура, Бишкек.
Расм интернетдан олинди
