Қирқ йил қирғин келса: Туркиядаги харобалар остида ҳамон тириклар бор
Даҳшатли зилзиладан кейин тўққиз кун ўтиб яна бир офат тарқалиши хавфи пайдо бўлди.
Би-би-сининг ўзбек хизматининг бугун, 16 февраль куни берган маълумотига кўра, Туркия ва Сурияда юз берган даҳшатли зилзилалардан кейин тўққиз кун ўтиб, қутқарув ишлари тўхтатилган ва фақат тозалаш ишлари кетаётган бир пайтда вайроналар остидан яна уч нафар аёл ва икки бола тирик топилган.
Аёллардан бири, 42 ёшли Мелике Имамўғлу бўлса, иккинчиси 74 ёшли Жемиле Кекеч экани айтилмоқда. Мелике Имамўғлуни қутқариш вақтида олинган видеони Дарижа шаҳрининг мэри Музаффар Бийик ижтимоий тармоқларга жойлаган.
Видеода Меликени «Тез ёрдам» машинасига ўтқазишаётган пайти ва қутқарувчиларнинг қарсак чалганча, бир-бирларини бағриларига босаётгани акс этган. Маҳаллий нашрларнинг ёзишича, қутқарилган пайтида Мелике ўзини «ажойиб» ҳис этаётганини айтган.
Даҳшатли зилзилалардан қаттиқ жабр кўрган Антакья шаҳридан ҳам худди шунга ўхшаш хабар олинган. Маълум бўлишича, у ерда бир аёл икки нафар боласи билан бирга вайроналар остидан тирик топилган.
Шу йилнинг 6 феврали тонгида Туркия ва Сурияда юз берган ҳалокатли зилзила натижасида ҳалок бўлганлар сони 41 мингдан ортди. Тозалаш ишлари давом этмоқда ва БМТ мутахассислари қурбонлар сонининг 50 минг ошиши мумкинлигини таҳмин қилишмоқда. Ўн минглаб турли даражада шикастлаган фуқаролар касалхоналарга етказилган. Минглаб турар-жой бинолари вайрон бўлиб, ўн минглаб одам бошпанасиз қолган.
Жабрланганлар ва ҳалок бўлганлар орасида Қирғизистон ва Ўзбекистон фуқаролари ҳам бор экани маълум бўлди. Улар ўз ватанларига олиб келиниб, дафн этилди.
Зилзиладан кейин бир ҳафта ўтгач, чет элдан келган қутқарувчилар тирик қолган одамларнинг бўлишига шубҳа қилиб, ўз юртларига қайтиб кетишган. Лекин шундан кейин ҳам фожиа содир бўлган жойда тирик қолган одамлар топилиб турибди.
Шу вақтнинг ўзида зилзила содир бўлган жойда турли касалликлар тарқалиши хавфи пайдо бўлгани айтилмоқда. Чунки офат содир бўлган ҳудуднинг катталиги ва вайроналикларнинг кўлами улкан экани натижасида у ерга сув ва керакли гигиена воситалари ва ҳатто озиқ-овқат етказиб бериш ҳамон мушкул бўляпти. Демакки оддий тозалик, санитария талаблари бажарилмаяпти. Айрим жойларда оддий ҳожатхоналар етишмаётгани, одамлар, ҳатто қутқарувчиларнинг зилзила содир бўлган кундан тортиб ювинмаганлари айтилмоқда.
Айниқса, қўшни Сурияда аҳвол жуда оғир, ҳукумат ва исёнчилар ўртасидаги қарама-қаршиликлар ва тўқнашувлар туфайли зилзила юз берган жойга озиқ-овқат ва дори-дармонлар етказиб бериш ҳамон мушкуллигича қолмоқда.
Бирлашган миллатлар ташкилоти берган маълумотга кўра, Сурияда зилзила юз берган жойларда бу табиий офатга қадар ҳам 5 миллион киши инсонийлик ёрдамига муҳтож ҳолда кун кўриб келаётган эди.
Оқбура, Бишкек.
Сурат интернетдан олинди
