Алмазбек Атамбаев ўкинади, лекин сиёсатга қайтиши мумкин

Қамоқдан озод қилинган собиқ президент журналистлар учун матбуот анжумани ўтказди.

Қирғизистоннинг кечагина қамоқдан чиқарилган собиқ президенти Алмазбек Атамбаев бугун, 15 февралда даволаниш учун Испанияга учиб кетди. Бу ҳақда “Озодлик”ка Жўғўрқу Кенешнинг собиқ депутати Асел Қодуранова маълум қилган.

Кеча қамоқдан чиқаркан, журналистнинг йўл-йўлакай берилган Испанияга (даволангани) қачон кетиши ҳақидаги саволига Атамбаев, “Қанча тез бўлса шунча яхши. Оёғим қаттиқ оғрияпти. Юрак ҳам безовта қиляпти”, дея жавоб берган эди.

Қодуранованинг сўзларига кўра, даволангач, собиқ президент Қирғизистонга қайтиш ниятида. «… Катта эҳтимол билан унга амалиёт қилинади. Лекин у албатта Қирғизистонга қайтади”, – деди Қодуранова.

Соғлигидан жиддий шикоят қилаётган бўлишига қарамай, Атамбаев кеча ўз уйида журналистлар учун матбуот анжумани ўтказди. Учрашув чоғида у ўзининг қамоқдан чиқишида “Социалистик Интернационал” раиси, Испания бош вазири Педро Санчоснинг хизмати катта бўлганини айтди.

Шу билан бирга у Қирғизистон президенти Садир Жапаров ва унинг дўсти, Миллий хавфсизлик давлат қўмитаси раиси Қамчибек Ташиевларнинг номига ҳам илиқ сўзлар айтди: “…албатта, улар бўлмаганда бу мумкин бўлмас эди”.

Алмазбек Атамбаев ўзининг президентлиги чоғида журналистларни судга бергани хато бўлганини тан олди ва мамлакатда сўз эркинлиги бўлиши лозимлигини таъкидлади.

Маълумки, Атамбаев президент бўлиб турганда Бош прокуратура президентнинг обрўсига путур етказганини даъво қилиб, уни танқид қилган бир қатор ОАВ ва журналистлар ҳамда фаолларга қарши жиноий иш қўзғаган  ва  улардан Атамбаевнинг фойдасига умумий ҳисобда 60 миллион сўмга (бугунги курс билан 690 минг АҚШ доллари атрофида) яқин пул талаб қилган эди. Атамбаев бу даъволарнинг бир қисмидан воз кечган, қолган ишлар эса мамлакатда ҳокимият алмашгач, қисқартирилган.

Сиёсатга қайтиш эҳтимоли ҳақидаги саволга жавоб бераркан, Атамбаев ўзига хос қувлик билан буни истамаслигини, лекин баъзи ҳолатлар одамни сиёсат билан шуғулланишга мажбур қилишини айтди.

Шуни айтиш керакки, суд собиқ президентни оқлагани йўқ, кеча Олий суд фақат унинг ишини қайта тергов қилиш учун қайтариб, маҳбуснинг ўзига даволаниб келиш учун чет эга чиқишга рухсат берди. Қамоқдаги жиноят оламининг обрўли кишиси деб тан олинган Азиз Батуқаевнинг 2013 йилда ноқонуний озод этилиши билан боғлиқ иш юзасидан у 2022 йилда 11 йилга озодликдан маҳрум қилинган эди.

Бугунги кунда собиқ давлат раҳбарига нисбатан қатор жиноий ишлар очилган бўлиб, улар орасида ноқонуний йўл билан бойиш, Бишкек Иссиқлик маркази таъмиридаги қонунбузарликлар ва ўзининг Қўйташ қишлоғидаги уйини штурм қилиш чоғида куч органларига қаршилик кўрсатиш ва бошоломонликларни уюштириш кабилар айбловлар бор.

Шунингдек унга қарши 2010 йилнинг июнида мамлакат жанубида юз берган қонли миллатлараро тўқнашув бўйича ҳам саволлар бор. Бу масалада берилган саволга собиқ президент бу фожиа учун жавобгарлар бошқа одамлар эканини, бу иш юзасидан ўзбек жамоатчилигининг ўша пайтдаги лидери, марҳум Қодиржон Ботировни мамлакатдан чиқиб кетишига кўмаклашган амалдорларни жавобгарликка тортиш кераклигини айтди. Ўша амалдорлар қаторида у собиқ президент Роза Ўтинбоеванинг номини тилга олди.

Хуллас, Атамбаев, агар юртига қайтиб келса ва сиёсат билан шуғулланишга қарор қилса, унинг бу истагини бўғиб қўйиш учун усуллар етарли.

Маълумки, Қирғизистонда бугунги ҳокимият турли жиноятларда гумон қилинган собиқ амалдорлар ва ишбилармонлар устидан жиноий ишлар очиб, уни ёпиш эвазига давлат ҳисобига катта маблағлар ундириб келади. Бу усул Атамбаевга нисбатан қўлландими, йўқми, ҳозирча ноъмалум. Бунгача Атамбаевнинг ўзи бир неча бор миллиардлаб доллар пули борлигини айтиб келган.

Алмазбек Атамбаев Испанияга ўғли Қадирбек ҳамроҳлигида кетгани айтилди, лекин кўпдан бери соғлиги ёмонлашган рафиқаси ҳам улар билан биргами-йўқми, бу ҳақда маълумот йўқ.

 

Оқбура, Бишкек.

Расм интернетдан олинди

боғлиқ хабарлар

Изоҳ қолдиринг