Алвидо, футбол қироли! Афсонавий Пеле 82 ёшида саратондан вафот этди
Асли тўла исми Эдсон Арантис ду Насименту бўлган, Пеле исми билан «Футбол қироли» номини олган бразилиялик афсонавий футболчи 29 декабр пайшанба куни узоқ давом этган касалликдан сўнг 82 ёшида ҳаётдан кўз юмди.
Бу ҳақда Пеленинг қизи Кели Насименто Instagram`да хабар берган.
«Биз сиз туфайли ҳаётда ўзимизни топдик. Биз сизни чексиз даражада севамиз. Жойингиз жаннатда бўлсин», деб ёзган Кели. Футболчи уч марта уйланган ва 6 фарзанди бор.
«Футбол қироли» ўтган йилнинг сентябрида йўғон ичакдаги саратон ўсимтасини олиб ташлаш бўйича жарроҳлик амалиётини ўтказган.
Шу йилнинг ноябрь ойи охирида врачлар футболчининг хасталигини, ўсимтанинг ўсишини ортга қайтаришга эриша олмаганларини қайд этишди. Камига коронавирус сабабли респиратор инфекцияси ҳам кучайиб, Пеле саратон терапиясини ўтказиш учун яна касалхонага ётқизилган эди.
Врачлар 22 декабрь куни Пеленинг саратони авж олгани натижасида юрак ва буйраклари фаолиятининг бузилиши ҳам аниқлангани ҳақида хабар беришди. Охири буларнинг ҳаммаси бир бўлиб, афсонавий футболчининг организми дош беролмаган дардга айланди.
Пеле футболдаги ҳаёти давомида рақиблар дарвозасига мингдан ортиқ тўп киритган, уч марта жаҳон чемпиони (1958, 1962, 1970) бўлган. Жумладан, фақат Бразилия терма жамоасида 92 ўйин ўтказиб, 77 та гол урган. Бу кўрсаткични 50 йил давомида бирорта футболчи такрорлай олмаган.
ФИФА уни аргентиналик Диего Марадона билан биргаликда XX асрнинг энг яхши футболчиси деб топган.
Халқаро олимпия қўмитаси эса миллионлаб мухлисларига эга бўлган Пелени ХХ асрнинг энг яхши спортчиси деб тан олган.
Алвидо, футбол афсонаси!
Оқбура, Бишкек.
Расм интернетдан олинди
