Ўзбекистон келаси йилни Инсонга эътибор ва сифатли таълим йили деб эълон қилади
Инсонга эътибор кучайиши баробарида амалдорлар сонини кескин қисқартириш кўзда тутилмоқда.
Келаётган янги, 2023 йил Ўзбекистонда “Инсонга эътибор ва сифатли таълим” йил деб эълон қилинади. Бу ҳақда президент Шавкат Мирзиёевнинг 20 декабрда Олий Мажлис ва Ўзбекистон халқига қилган мурожаатида айтилди.
Шавкат Мирзиёев бу қарор билан республика раҳбарияти Ўзбекистонда олиб борилаётган давлат сиёсатининг марказида инсон ва унинг манфаатларини таъминлаш устувор вазифа деб тан олинишига урғу берди.
“Аслида ҳам, бизнинг энг бебаҳо бойлигимиз – бу бунёдкор халқимиз, дуогўй ота-оналаримиз, навқирон авлодимиз эмасми? Шу юртда яшаётган ҳар бир инсоннинг тинч ва бахтли ҳаёт кечириши, унинг соғлиғи жойида бўлиши, яхши таълим олиши, оиласини тебратиши учун қандай шароит керак бўлса, ҳаммасини яратиб беришга ҳаракат қиляпмиз ва бу йўлдан асло тўхтамаймиз”, – деди Ўзбекистон президенти ўз мурожаатида.
Ўтиб бораёган йил мамлакатда «Инсон қадрини улуғлаш ва фаол маҳалла йили” деб эълон қилинган эди.
Украинадаги Россия босқини ва бу билан боғлиқ киритилаётган кенг қамровли санкциялар нафақат Россия, балки унинг стратегик ҳамкорлари бўлган Марказий Осиё давлатларининг, жумладан Ўзбекистоннинг иқтисодиётига ҳам ўзининг салбий таъсирини бермоқда. Ўзбекистон бу йил мисли кўрилмаган энергетика танқислигини бошидан кечирмоқда.
Бунга расмийлар аҳоли сонининг ўсиши, табиий газ ва электр энергиясига бўлган талабнинг ошиши, саноат ва бошқа соҳаларда ҳам электр ва газ қувватига бўлган эҳтиёжнинг кескин ортиши билан изоҳ бермоқдалар.
Ўзининг йиллик мурожаатида Шавкат Мирзиёев келгуси йилдан тортиб мамлакат ҳукумати ўз иш услубини ҳам тубдан ўзгартиришини айтди. Унинг айтишича, биринчи галда вазирлик ва давлат идоралари сони кескин қисқартирилиб, ҳозирги 61 тадан 28 тагача камайиши режалаштириляпти.
Шунингдек президент кўплаб вазирларнинг ўзгаришини ва давлат хизматчиларининг сони босқичма-босқич қисқариб бориб, ҳозирги мавжуд амалдорлар сонининг деярли учдан иккиси қолишини айтди. Шу йўл билан иқтисод қилинадиган маблағлар аҳоли фаровонлигини ошириш мақсадида ижтимоий масалаларни ҳал қилишга йўналтирилади.
Қўшни давлатлар раҳбарлари, жумладан Қирғизистон президенти Садир Жапаров ҳам ҳозирча ана шундай анъанавий мурожаатлар билан чиқишгани йўқ. Тожикистон президенти Имомали Раҳмон доимгидай мамлакат аста-секин лекин ишонч билан олға юриб бораётганини таъкидлаб, чиқиш қилди. Лекин мамлакат аҳолиси турмушнинг тобора оғирлашиб бораётганидан азият чекиб, Россияга кетишга мажбур бўлишмоқда.
Россия президенти Путиннинг эса бу йил умуман ана шундай мурожаат қилиш одатидан воз кечгани маълум бўлди. Шунингдек рус президенти ҳар йили катта дабдаба билан ўтадиган катта матбуот анжуманини ҳам ўтказмайдиган бўлди.
Экспертларнинг фикрича, Путин одатда ҳар йили икки мингдан ортиқ журналист иштирок этадиган анжуманда Украинадаги уруш ва Россиянинг у ердаги маҳлубиятларига оид саволлар берилиши ва уларга жавоб беришни истамагани боис бу тадбирни бекор қилган.
Оқбура, Бишкек.
Расм интернетдан олинди
