Бу нимаси? Россиядаги қирғизистонликларда “уятли” хасталиклар кўпайдими?

Меҳнат муҳожирларини тиббий текшириш борасида Қирғизистон парламентида шубҳа пайдо бўлди.

Қирғизистон парламенти депутати Нуржигит Қадирбеков Жўғўрқу Кенешнинг навбатдаги йиғилишида Россияда муҳожирлик бўйича қонунчиликка мувофиқ тиббий кўрикдан ўтаётган қирғизистонликларнинг кўпчилигида тери-таносил касалликлари аниқланаётгани ҳақида шубҳа билан гапирди.

Депутатнинг шубҳасига сабаб бўлган яна бир нарса шуки, Россия томони бундай муҳожирларнинг барчасини даволаниш учун мажбурий равишда фақат битта клиникага жўнатишмоқда. Қадирбековнинг фикрича, россиялик тиббиётчилар шу йўл билан қирғизистонлик муҳожирлар ҳисобидан “пул қилишмоқда”.

Депутатнинг айтишича, Сахаров марказида очилган тиббиёт муассасаси ҳар бир текширилган муҳожирдан 5700 рубл ўлчамида ҳақ олади. Бу пул эвазига муҳожирларда

ВИЧ (Одамдаги иммун тақчиллиги вируси), сил (туберкулёз) лепра, сифилис ва бошқа тери-таносил касалликлари мавжудлиги текширилади. Бу хасталиклардан бирортаси топилган тақдирда мижоз мажбуриш даволаниш учун жўнатилади.

Бу ўтган йилнинг декабрида кучига кирган қонун талаби. Маълумки, кўрсатилган “уятли” хасталикларнинг деярли ҳаммасининг асосий сабабларидан бири – пала-партиш жинсий алоқа қилиш ҳисобланади.

“Даволанишга муҳтожларнинг барчаси Ленин проспектидаги фақат битта клиникага юборилади ва даволаниш учун 18 минг рубль талаб қилинади. Афтидан, улар фуқароларимиз ҳисобидан пул ишлашмоқда, – дея таҳмин қилади Қадирбеков. – Ташқи ишлар вазирлигимиз ва элчихонамиз буни текширсин. Нега улар бизнинг фуқароларимизга шундай муносабатда бўлишмоқда?”

Шунингдек депутат ана шу текширишлар давомида Қирғизистон фуқароларининг ҳуқуқлари поймол этилаётгани аниқланса, зудлик билан чора кўришни расмийлардан сўради. Айтиб ўтиш керакки, бунгача бирорта фуқародан айтилган масалада расман ариза тушмаган. Нима бўлган тақдирда ҳам бу жараённи назорат остига олиш зарурлиги аниқ. Агар текширув натижалари чинданам тўғри бўлса, нега Қирғизистон фуқаролари орасида тери-таносил касалликлари кўп экани текширилиб, тегишли чоралар кўриш керак бўлади.

Эслатиб ўтамиз, 2021 йилнинг 29 декабрида Россия Федерациясининг “Чет эл фуқароларининг ҳуқуқий мақоми тўғрисида”ги ва “Бармоқ изини давлат рўйхатидан ўтказиш тўғрисида”ги қонунларига ўзгартиришлар киритилди. Бу ўзгаришларга биноан Россияга вақтинча яшаш ёки ишлаш учун борган ҳорижликлар, жумладан, Қирғизистон фуқаролари ҳам юқумли касалликлар бўйича текширувдан ўтиши, бармоқ изларини топшириши, суратга туширилиб, махсус рўйхатга олинишлари шарт.

Бунгача ҳам Қирғизистон парламенти ва жамоатчилик орасида Россиядаги муҳожирларга қўйилган янги талаблар улар учун қўшимча ҳаражат ва бошқа муаммоларни келтириб чиқараётгани масаласи кўтарилган. Жумладан киритилган бу янги талаблар Евроосиё иқтисодий иттифоқи (ЕОИИ) доирасидаги ўзаро келишувларга зид экани ҳам бир неча бор айтилган.

Мана шунга ўхшаш муаммолар сабабли сўнгги пайтда ташкилот сифатида обрўси тушиб бораётган ЕОИИга Қирғизистондан ташқари Арманистон, Беларус, Қозоғистон ва Россия киради.

Оқбура, Бишкек.

Расм интернетдан олинди

боғлиқ хабарлар

Изоҳ қолдиринг