Профессионал рингга йўл: Ўзбек жангчисини Америка тан олди
Янги чемпион яқин беш йил ичида Америкада шуғулланиб, профессионал рингни ўзлаштиради.
Қирғизистонлик 28 ёшли кикбоксчи Иқболжон Фозилжонов профессионал рингдаги илк жангида нокаут билан ғалаба қозониб, беш йиллик шартнома асосида АҚШда фаолият юритадиган бўлди. Бу ҳақда спортчининг устози Обиджон Алимов “Оқбура”га билдирди.
Бир неча кун аввал АҚШнинг Арлингтон шаҳрида бўлиб ўтган халқаро WAR KICKBOXING турнирида Фозилжонов АҚШ профессионал рингидаги дебют жангини бошлади ва биринчи жангдаёқ рақиби Диллон устидан нокаут билан ғалаба қозонди.
Янги чемпион Ўш вилоятининг Ўзган шаҳридан.
“Иқболжон рақибини кузатиб, унинг ҳаракатларига қараб ҳужум қилгани учун рақибини нокаут қила олди. Унинг жанг найранглари америкаликларга ёқиб қолди. Кейин уни шартнома асосида океан ортида олиб қолишга келишилди”, – дейди Обиджон Алимов.
Бу турнирга йўлланма олиш учун Иқбол Фозилжонов 2021 йилда Италияда ўтказилган кикбоксинг бўйича Жаҳон чемпионатида 63 килограмм вазн тоифасида Босниялик ва Қозоғистонлик рақибларини енгиб, финалга чиққан. Ана шу ғалабаси орқали америкадаги кикбоксинг олимпиадасига йўлланмани қўлга киритган. Шу асосда WAR KICKBOXING турнирида иштирок этиш учун АҚШга борди.
Иқболжон Фозилжонов кикбоксинг бўйича Қирғизистоннинг етти карра чемпиони, Осиё чемпиони, бунгача жаҳон чемпионатида кумуш медали совриндори бўлган эди.
Устозининг сўзларига кўра, Фозилжонов 2004 йили 10 ёшида унга шогирд бўлиб келган. Орадан икки йил ўтиб, 12 ёшида Тошкентда ўтказилган кикбоксинг бўйича ёшлар ўртасидаги жаҳон чемпионатида биринчиликни қўлга киритган.
“Оқбура” муҳбирига берган интервьюсида кикбоксчининг ўзи ҳозирда АҚШда яшаб, турнирларга тайёргарлик кўраётганини билдирди. Бундан ташқари у ўша ерда ишлаш билан бирга, инглиз тилини ҳам ўрганмоқда.
Асли касби фармацевт бўлган Иқболжон 6 ёшида кикбокс билан шуғуллана бошлаган. Илк ғалабасини 7 ёшида Ўш вилояти Ўзган тумани биринчилигида қўлга киритган.
“Оилада тўрт нафар ўғилмиз, катта акаларим футбол билан шуғулланишади, улар Ўзган терма жамоасида ўйнашади, укам ҳам менинг изимдан бориб, кикбокс билан шуғулланади. Ота-онам зиёли бўлишгани учун бизни спорт билан шуғулланишдан ташқари олий таълим олишга ундашган. Акаларим шифокор. Мен эса фармацевтикани битирганман. Аммо ҳозирча касбим бўйича ишлаганим йўқ”, – дейди спортчи.
Кикбокс инглиз тилидан олинган бўлиб, «кик» – оёқ билан ҳужум; “бокс” – бокс, муштлашув деган маънони англатади. Яъни бу спорт турида спортчилар қўл ва оёқлари билан жанг қилиб, рақибини кўтариб отиши ҳам мумкин. Ушбу жанговор спорт тури ХХ асрнинг 60-70-йилларида пайдо бўлган. Тарихий жиҳатдан у америкалик кикбоксинг, япон кикбоксинги, яккахон композицияларга бўлинади. Халқаро олимпия қўмитаси томонидан тан олинган, аммо ҳозирда Олимпия ўйинлари дастурига киритиш таклиф қилинмаган.
Умида Мирзабоева, Оқбура, Ўш
Расмлар ва видео Фозилжоновнинг шахсий архивидан
