“Ватанпарварлик” юзи: Россия зобити таксичини отиб ўлдирди

Хабарларга қараганда, бу жиноятга Украинадаги уруш хусусидаги баҳс сабаб бўлган.

Россиянинг Ростов-на-Дону гарнизони ҳарбий суди рус армияси зобитини оддий такси ҳайдовчисини ўлдиришда гумон қилиб, икки ойга ҳибсга олди.

Россия оммавий ахборот воситалари берган хабарларга кўра, Москва вилоятидан келган, капитан унвонидаги 33-ёшли зобит ўзи ўтирган такси ҳайдовчиси билан Украинадаги уруш масаласида баҳслашиб қолган ва жаҳл устида уни отиб ўлдирган.

Афтидан, такси ҳайдовчиси Украинадаги урушга қарши фикр билдирган. Зобит эса, ўз фикрини исботлашга далил топа олмай қолганми, таксичига қараб тўппончадан 4 марта (!) ўқ узган. Таксичининг жони тез ёрдам етиб келгунга қадар узилган.

Зобитнинг 82717 ҳарбий қисм капитани Алексей Крилов экани, такси ҳайдовчисининг эса Озарбайжондан келган 51 ёшли Роман Говасари экани аниқланган. Унинг яқинлари фожиадан хабардор, лекин ҳали ошкора бир нарса дейишмаган. Россиянинг 161.ru сайтининг ёзишича, Қотил капитан Москва яқинидаги Руза шаҳридан бўлиб, ракета қўшинларида хизмат қилган ва бир неча “қайноқ нуқта”ларга жўнатилгани маълум.

«Коммерсант» нашри хабарига кўра, Россия Тергов қўмитаси бу ҳодиса юзасидан ҳарбийга “эҳтиётсизлик оқибатида ўлимга сабаб бўлгани учун” иш очган. Унга кўра, зобитга бор-йўғи 15 йилгача қамоқ жазоси берилиши мумкин. Эҳтиётсизлик қилиб тирик одамга 4 марта ўқ узиш, нари борганда кулгили гап эмасми?

Бу воқеа Россиянинг Украинага босқинини қўллаганлар, жумладан, айрим ана шундай юртдошларимиз учун жиддий аломат бўлса ажаб эмас. Ватан ҳимояси, фуқаролар тинчлигини сақлаш учун топширилган қурол билан ўз ватандошини, тинч аҳоли вакилини ўз фикрини очиқ айтгани учунгина отиб ўлдирган зобит ҳарбий трибуналга берилиб, энг олий жазога ҳукм қилинса арзийди.

Иккинчи томондан олиб қаралганда, Россия аскарлари орасида ҳам бу урушнинг беъманилиги, унинг минглаб оддий одамларнинг, юзлаб гўдакларнинг ўлимига сабаб бўлаётганини, инсониятга қарши жиноят эканини тушунганлар ҳам талайгина бўлса керак. Фақат улар дардлари ичида, фикрини очиқ айтишдан қўрқишади. Ана ўшалар чуқур руҳий инқироз исканжасида қолиб, қилаётган ишлари учун жавоб бера олмаслик даражасига етишлари мумкин.

Бошқа тоифалари эса жон-жаҳди билан Путиннинг уруш сиёсатини қўллаб, ўзларининг ҳарбий жиноятларини оқламоқчи бўладилар. Такчисичини отиб ўлдирган зобит қайси тоифага кириши ёлғиз Яратганга маълум. Балки суд жараёнида у ҳам “ёрилар”?..

Оқбура, Бишкек.

боғлиқ хабарлар

Изоҳ қолдиринг