Саратон эмас… АҚШ президенти Байден сафардан коронавирус билан қайтди
Ўтган ҳафта Америка раҳбари Саудия Арабистони ва Исроил давлатларига ташриф буюрган эди.
АҚШ президенти Жо Байден четэ эл сафаридан қайтгач, коронавирус инфекциясини аниқлаш учун топширган тест мусбат натижа берган. Бу ҳақда “Оқ уй” тарқатган пресс-релизда айтилади.
Бунгача 79 ёшли Байденнинг тўлиқ вакцинация курсидан ўтгани ва икки бора бустер-вакцина олганлиги маълум. Хабарда айтилишича, унда касалликнинг енгил аломатлари мавжуд. Шу сабабли ишлашда давом этмоқда ва дори-дармонлар қабул қилмоқда.
АҚШ президенти “Оқ уй” ходимлари билан телефон орқали мулоқот қилмоқда ва режалаштирилган учрашувларни видеоалоқа орқали ўтказмоқда. Вируснинг қаерда ва кимдан юққани аниқ эмас. Эслатиб ўтамиз, АҚШ коронавирус кенг тарқалган давлат бўлиб, бу касалликдан ўлганлар сони бўйича дунё давлатлари ичида олдинги ўринларни эгаллаб келмоқда.
Маълумот ўрнида, 13-16 июл кунлари Жо Байден Яқин Шарққа ташриф буюриб, сафар доирасида Исроил ва Саудия Арабистони ҳукуматлари раҳбарлари билан учрашган эди. 19 июл куни эса Байден ўз рафиқаси Жилл Байден билан Украина президенти Владимир Зеленскийнинг аёли Елена Зеленскаяни қабул қилган.
Бир кун аввал Байден Массачусетс штатида сўзлаган нутқида ўзининг саратон билан оғригани ҳақида айтиб, табиблар унинг терисидан шишикларни олиб ташлашганини маълум қилган. Бунга ўзининг болалиги ўтган Делавер штатидаги иқлимнинг ифлослиги сабаб бўлганини маълум қилган.
Кейинроқ президент матбуот котибининг ўринбосари Байденнинг гапларига тузатиш киритиб, Байден президент бўлгунга қадар унинг терисидан шишиклар олиб ташлангани тўғрилигини, лекин тиббий ҳужжатда унинг саратон касали экани айтилмаганини маълум қилган.
Оқбура, Бишкек.
Расм интернетдан олинди
