Эгардан тушса бўларди. Вазир ҳамон халқ Қаҳрамонини тан олишни истамаяпти
Қирғизистон Соғлиқни сақлаш вазири Бейшеналиев Эрнст Акрамов номини улуғлашга қарши чиқмоқда.
Ўзининг одобсизлиги ва давлат хизматчиси этикасини қўпол равишда инкор қилиб келаётгани билан танилган вазир Алимқадир Бейшеналиев, Қирғизистон Қаҳрамони, дунё таниган хирург, фан доктори, минглаган одамлар миллат фахри сифатида тан олган Эрнест Акрамовнинг номини ўзи ишлаётган Чуй вилояти касалхонасига берилишига қарши. Бу ҳақда у 24.kg сайтига маълум қилди.
“Агар ном берадиган бўлсак, барча касалхоналарга бировларнинг номларини бериш керак, – деди у журналистларга. – Акрамовга ўхшаган одамлар ҳар бир туман, вилоят касалхонасида бор…”
Вазир бу қарорни йўққа чиқариш учун Вазирлар маҳкамасига мурожаат қилишини айтди.
Қирғизистондаги энг йирик сиҳатгохларнинг бири бўлган Чуй вилоят касалхонасига Акрамовнинг исмини бериш ғояси кўп йиллардан бери айтилиб келади. Икки кун аввал Бош вазир ўринбосари Эдиль Байсалов ўзининг Twitter даги хабарида ниҳоят бу масала ҳақида қарор қабул қилинганини маълум қилган. Бунгача амалдор номи тилга олинган касалхонасини кўргани бориб, Эрнст Акрамов билан ҳам учрашган.
Бу хабар жамоатчилик орасида катта қувонч билан кутиб олинди.
Қирғизистонда соғлиги туфайли имкониятлари чекланган болалар ва кам таъминланган тоифадаги беморлар ҳуқуқларини ҳимоя қилиши билан танилган фаол Динара Аляева Акрамовнинг исмини Чуй вилояти касалхонасига бериш ҳақида давлат раҳбарларига ёзилган хатга 700 нафардан ортиқроқ одам қўл қўйганини маълум қилган.
Бу ҳақда у ижтимоий тармоқларда ёзган.
Эслатиб ўтамиз, икки ой аввал номи тилга олинган вазирнинг буюк жарроҳ Эрнст Акрамовга ҳурматсизлиги жамиятда кенг норозилик туғдирган эди.
Бейшеналиев тиббиёт фанлари доктори, Қирғизистон Қаҳрамони, 85 ёшли Эрнст Ҳошимович Акрамовни лавозимидан бўшатиб, унинг шаънига жуда қўпол сўзларни айтиб, машҳур жарроҳни касалхонанинг жарроҳлик бўлими бошлиғи лавозимидан олганини ҳам айтган эди.
“Касалхонага янги раҳбар тайинладим. У Акрамовни қаерга қўйишини билмайман. У (Акрамов) у ерда ишламайди, ўша ерда яшайди. Мен, ҳайдаб юборишнинг кераги йўқ, яшайверсин, дедим. Унинг уйи йўқ, қариндош-уруғи йўқ. Яшайверсин”, деган эди вазир Бейшеналиев.
Аслида Бишкекда Эрнст Акрамовнинг ота-онасидан қолган эски квартираси бор. Бироқ кўп йиллардан бери касалхонада унга алоҳида ажратиб берилган хонада яшаб келади. Бунинг сабаби ишидаги зарурат билан боғлиқ эканини у бир неча йил олдин журналист Абдумўмин Мамараимовга тушундирган эди.
“Квартирам олисда, бу ерга зудлик билан амалиёт ўтказиш зарур бўлган беморлар жуда кўп келади. Баъзида инсон ҳаётини бир неча сония ҳал қилиб қўяди. Қолаверса, беморлар ярим тунда, эрта тонгда, доимо кутилмаган пайтда олиб келишади. Шу сабабли менинг доимо шу ерда ҳозир бўлишим жуда зарур”, деган эди у ҳорғин жилмайиб.
Касалхона ходимлари, айниқса у раҳбарлик қилган жарроҳлик бўлимидагилар кекса жарроҳни оталаридай авайлаб, муомала қилишади. Қирғизистонда уни танимаган киши йўқ ҳисоби.
Бизнинг маълумот: Эрнст Акрамов 1936 йилда Бишкек шаҳрида туғилган. Тиббиёт фанлари доктори (1990), профессор (1998). Қирғизистонда хизмат кўрсатган фан арбоби, собиқ СССР халқ депутати, Қирғизистон Жўғўрқу Кенеши 4-чақирилиши депутати. Фан ва техника соҳасида Қирғизистон давлат мукофоти лауреати. Спорт гимнастикаси бўйича спорт устаси, бир неча бор республика чемпиони бўлган.
Эрнст Акрамов ўзбек миллатига мансуб икки Қирғизистон Қаҳрамонидан бири (биринчиси – фазогир Солижон Шарипов).
Машҳур жарроҳ 350 дан ортиқ илмий ишлар муаллифи. Шогирдлари орасидан 20 нафари тиббиёт фанлари номзоди. Шунингдек, Акрамов жарроҳлик амалиётига киритилган ихтиролар ва ноёб усуллари учун 23 та патент муаллифи.
Вазирнинг беҳаёларча гапларидан кейин, ижтимоий тармоларда #Акрамовданқўлингниторт! хештеги остида норозилик акциясини бошланган.
Жамоатчиликда катта норозилик пайдо бўлгач, вазир Чуй вилояти касалхонасига бориб, Эрнст Акрамов билан учрашган ва у билан бирга кўчат эккани ҳақида маълумот расмлари билан тарқатилган. Лекин чамаси, “букрини гўр тўғрилайди”, деган гап шу ерда ҳам ўз аксини топадиганга ўхшайди.
Вазир бўлганидан бери Алимқадир Бейшеналиев ўзининг давлат президентига яқин эканини яширмай, жамиятда кенг норозиликларга, масхара ва кескин танқидларга сабаб бўлган гапларни айтиб, тиббиёт соҳасидаги таниқли раҳбарлар билан “олишиб” келади.
Алимқадир Бейшеналиев вазирлик лавозимига 2020 йилнинг октябрида президент Садир Жапаровнинг таклифи билан тайинланган. Ҳанузгача президент юқорида аталган воқеаларга ўз муносабатини билдиргани йўқ.
Оқбура, Бишкек.
Расм интернетдан олинди
