Бизникилар Италияда. Камида етти нафар қирғизистонлик ноқонуний муҳожирлик учун қамалган
Италия қамоқхоналарида Қирғизистоннинг камида етти нафар фуқароси ноқонуний муҳожирликда юрганликлари учун сақланмоқда.
Бу ҳақда Бишкекда бўлиб ўтган давра суҳбатида ИИВнинг Экстремизм ва ноқонуний миграцияга қарши кураш хизматининг махсус масалалар бўйича катта терговчиси Улан Керимқулов маълум қилди.
“Сўнгги пайтларда Италия ҳуқуқ-тартибот идоралари томонидан Қирғизистон Республикаси фуқароларини муҳожирлик билан боғлиқ ноқонуний фаолияти учун ҳибсга олиш ҳолатлари тез-тез учрамоқда. Уларнинг деярли барчаси денгиз орқали чегарадан ноқонуний ўтаётганида қўлга олинган”, — деди у.
Текширув натижаларига кўра, қўлга олинганлар турли вақтларда ўзбошимчалик билан Туркияга ишлаш учун борганликлари аниқланган.
Туркияда улар ўртамчиларнинг қопқонига тушиб қолишган ва ноқонуний меҳнат қилишган.
“Италияда русийзабон қонунбузарларни ҳимоя қилаётган адвокат Олеся Дзеджинскаянинг маълум қилишича, ўтган вақт мобайнида у Украина фуқароларини ҳимоя қилиб келган. Кейинчалик Россия фуқароларининг ҳибсга олишлар бошланган. Дзеджинскаянинг айтишича, 2020-йилдан буён қамоққа олиш тўлқини Марказий Осиё фуқароларига тарқалди. 2021-йилдан бошлаб Қозоғистон ва Ўзбекистон фуқаролари ҳам Италия қамоқхоналарида сақланмоқда”, — дейди Улан Керимқулов.
ИИВ вакили қирғизистонликлар учун пайдо бўлаётган хавф-хатарларини камайтириш мақсадида давлат органлари ва хусусий бандлик агентликларини ушбу воқеаларни олдини олишга чақирди.
Эслатиб ўтамиз, ўтган йили Тўқмоқнинг икки фуқароси, 23 ёшли Александр Воеводин ва 20 ёшли Максим Глинчин 2020-йилнинг октабрида яқин танишининг тавсиясига кўра Туркияга ишлаш учун кетишганди. Улар Туркиянинг йирик портларидан бирида туристик кемада кемачи бўлиб ишлашлари керак эди. Аммо улар жиноий бизнес билан шуғулланган – суриялик ва покистонлик ноқонуний муҳожирларни Туркиядан Италияга ўтказишга ёрдамлашишган.
Максим Глинчин Италияга қатнаётган вақтида ҳалок бўлган, Александр Воеводинни эса Италия полицияси қўлга олган. Унга 15 йил қамоқ жазоси тайинланди. Глинчиннинг жасади Бишкекка олиб келинган. Воеводин эса Италия қамоқхоналарида ўз муддатини ўтамоқда.
Таъкидлаш жоизки, Александрнинг онаси Ольга Воеводина милициянинг эътиборсизлиги юзасидан бир неча бор шикоят қилган. Унинг айтишича, терговчилар Ивановка қишлоғи турғунларини бирор марта ҳам сўроқ қилмаган, ваҳоланки ўша қариндошлари ўртамчилик қилиб, нафақат уни боласини, балки бошқа қирғизистонликларни ҳам ишга ёллашда иштирок этган бўлишлари мумкин.
Охири милиция ҳам маълумот бериб, гап нимада эканлигини айтиб берди, дастлаб жиноят иши қидирув сифатида қайд қилиниб, «одам савдоси» моддасига ўзгартирилган. Ўтган йилнинг декабри охирида Чуй вилояти прокуратураси қўшимча тергов ўтказиш учун материалларни Чуй вилояти ИИБнинг тергов хизматига юборган.
Кейинроқ яна бир қирғизистонлик Италияда ноқонуний юргани сабабли қўлга олингани маълум бўлди. Ҳозиргача унинг тақдири нима бўлаётгани ҳақида бирорта ҳам маълумот мавжуд эмас.
Улуғбек Каримов тайёрлади, Оқбура, Жалолобод.
Расм интернетдан олинди
