Урушнинг касри: UzAuto Россияга автомобиль жўнатишни тўхтатди
Акс ҳолда Жанубий Корея UzAuto Motors заводига бутловчи қисмларни жўнатишни тўхтатиши мумкин.
Eurasianet нашри берган хабарга кўра Ўзбекистоннинг UzAuto Motors корхонаси ўзи ишлаб чиқараётган енгил машиналарни Россияга етказиб беришни тўхтатган. Бунинг сабаби сифатида кўрсатилган заводда чиқадиган Chevrolet автомобилларида Жанубий Кореядан келадиган яримўтказгичлар ва микросхемалардан фойдаланилади. Жанубий Корея эса Украинадаги уруш туфайли Россияга қарши киритилган халқаро санкцияларга қўшилган.
Ғарб давлатлари киритган санкциялар талабларига кўра, Россияга экспорт қилиш тўхтатилган маҳсулот ва хом-ашёлар учинчи давлатлар томонидан ҳам берилмаслиги керак. Акс ҳолда ўша учинчи давлатга нисбатан ҳам санкцияга алоқадор чоралар кўрилиши мумкин. Шунга кўра, агар UzAuto Motors Россияга автомобиль етказиб беришда давом этса, Жанубий Корея бутловчи қисмларни Асака шаҳрида жойлашган заводга жўнатишни тўхтатиб қўйиши мумкин.
Озодлик радиоси билан суҳбатда UzAuto Motors корхонасининг матбуот котиби Алексей Агуреев Россияга автомобил етказиб бериш тўхтатилгани ҳақидаги хабарни тасдиқламади ҳам, рад ҳам этмади.
Ўзбек автомобиль заводининг АҚШдаги ҳамкори General Motors корпорациясининг Детройт шаҳридаги вакили Euroasianet мухбирига UzAuto Motors автомобилларининг Россияга экспорт қилиниши 9 мартдаёқ тўхтатилганини маълум қилди.
эслатиб ўтамиз, Россиянинг Украинага қарши ҳарбий ҳаракатлари туфайли АҚШ ва Европа Иттифоқи давлатлари киритган санкциялари натижасида ўнлаган Ғарб компаниялари Россиядан чиқиб кетган. Бу жараён ҳамон давом этмоқда.
Санкциялар туфайли халқаро ҳамкорлари билан алоқасини йўқотган ва ишлаш учун зарур шарт-шароитлардан маҳрум бўлган юзлаб россиялик ишбилармонлар ҳам ўз ватанларини тарк этиб, дунё бўйлаб кезиб кетмоқдалар. Жумладан уларнинг бир қисми вақтинчалик ишлаб туриш учун Марказий Осиё давлатларига келмоқдалар.
UzAuto Motors корхонаси машиналарининг Россия бозорига етказишни тўхтатилиши Ўзбекистоннинг ўзида бу автомобилларнинг нархлари тушиши таҳмин қилинмоқда.
“Ўзавтосаноат” давлат корхонаси берган маълумотга кўра, Ўзбекистон 2021 йилда Россияга атиги 320 дона машина экспорт қилган. Умуман эса, 2021 йилда Ўзбекистон дунёнинг 10 давлатга умумий миқдори салкам 282 миллион доллар бўлган деярли 29 минг автомобиль экспорт қилган. Уларнинг 96 фоизи қўшни Қозоғистонга тўғри келади.
Ўзбек автомобиллари харидорлари ичида сотилган машиналар сони бўйича иккинчи ўрин ҳозирда Россия босқинига дучор бўлган Украинага тегишли бўлиб, ўтган йили у ерга 448 дона автомобиль экспорт қилинган. 2019 йилда Ўзбекистон автомобиль экспортининг 12 фоизи Россияга тўғри келгани айтилади.
Айрим маълумотлара кўара, яримўтказгич ва микросхемалар етишмаслиги сабабли кўрсатилган корхонада ишлаб чиқариш ҳажми 2021 йилда 2020 йилдагига нисбатан деярли 16 фоизга камайган.
Оқбура, Бишкек.
Расм интернетдан олинди
