Элак сувдан кўтарилди: Олти партия парламентда, икки округда қайта сайлов

Етарлича овоз олган 88 номзод мандатларини олиб, янги парламент ўз ишини бошлаши мумкин.

Қирғизистон Марказий сайлов комиссияси 7 декабрь куни 28 ноябрда ўтган парламент депутатлигига сайловлардаги бюллетенларни қўлда санаш бўйича якуний натижаларни эълон қилди. Бунгача Марказий сайлов комиссияси овозларни автоматик тарзда ҳисобловчи қутилардан олинган маълумотларни эълон қилган эди. Бу маълумотлар расмий ҳисобланмайди.

Бюллетенлар қўлда 100 фоиз санаб бўлинганидан сўнг 5 фоизлик сайлов тўсиғидан олти партиянинг ўтгани қайд этилди. Жумладан, “Ата-Журт Қирғизстан” партияси 17,3% овозга эга бўлган бўлса, “Ишеним” партияси 13,63%, “Интимақ” – 10,99%, “Альянс” – 8,34%, “Бутун Қирғизстан” – 7,04%, ҳамда “Ийман Нуру” партияси сайловчиларнинг 6,15% овозини олишга муваффақ бўлишган.

Ўттиз олтита бир мандатли округдан 34 нафар номзод сайлангани аниқланди. Бишкек шаҳридаги икки сайлов округида 30 фоиздан ортиқ сайловчилар барча номзодларга қарши овоз беришган. Ҳеч бир номзод бундан ортиқ овоз олмагани боис, бу ерда қайта сайлов ўтказилади.

Ғолиб партияларнинг тўрттаси яқинда ташкил қилинган бўлса, “Ийман нуру” партияси аввалги сайловда ҳам фаол иштирок этган. “Бутун Қирғизстан” партияси эса, мамлакатдаги энг кекса партиялар қаторида жуда кўп сайловларда иштирок этиб, ҳамиша ютқазиб келаётган эди.

Янги депутатларнинг жинси ва миллий таркибини таҳлил қилиш шуни кўрсатадики, ҳозирча 18 депутат аёл бўлса, 70 нафари эркаклар. Бу нисбатан ёмон эмас. Миллий таркибига келсак, аҳвол ачинарли деса бўлади. Сабаби, мамлакатда 80дан ортиқ миллат вакиллари яшашига қарамай, тунгони миллати вакилларидан 3та, тожиклардан битта ва мамлакат аҳолисининг (расмий маълумотларга кўра) қарийб 15 фоизини ташкил қилган ўзбеклардан ҳам бир киши ўтибди, холос.

Ҳамиша парламентда ўзининг бир неча вакилларига эга бўлган рус миллатидан бу сафар бирорта ҳам номзод ўтмаган. Яъни, қонунда берилган миллий квоталарга қарамай, бугунги мамлакат парламенти деярли бир миллат – титулли миллат вакилларидан иборат бўлиб қолганини тан олиш керак.

Эслатиб ўтамиз, Қирғизистон парламентига сайловлар шу йилнинг 28 ноябрида бўлиб ўтди. Янги қоидаларга кўра, сайловчилар нафақат партияларга, балки уларнинг рўйхатларига киритилган муайян номзодларга ҳам овоз бериши мумкин ва лозим бўлган. Лекин бу янгиликни яхши тушунмаслик оқибатида 9 фоизга яқин бюллетенлар нотўғри тўлдирилган ва яроқсиз деб топилган.

Янги таркибдаги Жўғўрқу Кенеш депутатларининг 54 нафари партиялар сафида келган бўлса, 36 халқ вакили бир мандатли округлардан келиши қаралган. Юқорида айтиб ўтганимиздек, икки округда ҳали депутатлар ким бўлиши аниқ эмас.

Доимгидай сайловдан кейин ютқазиб қўйган партиялар ва номзодлар норозилик билдириб, намойишларга чиқдилар. Мухолифатдаги партияларнинг аксарияти бу сафар парламент деворларидан ташқарида қолди. Улар овоз бериш натижалари сохталаштирилганини айтиб, бу сайлов натижаларини тан олмасликларини эълон қилдилар. Лекин нима бўлганда ҳам, сайловлар якунига етди ва унинг натижаларини деярли барча давлатлар ва тегишли халқаро ташкилотлар тан олдилар.

Хуллас, руслар тили билан айтганда, “поезд жўнаб кетди”. Биз ғолиб партиялар ва номзодларни табриклаш баробарида, янги тартибда сайланган парламентнинг олдинда турган беш йиллик фаолиятига оқ йўл тилаймиз.

Оқбура, Бишкек

Сурат интернетдан олинди

 

боғлиқ хабарлар

Изоҳ қолдиринг