Бакиевлар ва Лукашенко: Ҳомийликнинг баҳоси қанча?
Беларусь куч тизимларининг собиқ ходимлари мамлакат президенти сирларини ошкор қилишмоқда.
Қирғизистоннинг собиқ президенти Қурманбек Бакиев ва унинг оиласи ўзлари жон сақлаб турган Беларусь давлати раҳбарига 1,6 миллион долларлик совға беришган. Бу маълумот Беларусь куч тизимларининг собиқ ходимларидан иборат, ҳозирда президент Александр Лукашенкога қарши турган BYPOL номли бирлашма эълон қилган суриштирувда келтирилган. Материал муаллифлари Лукашенкони мамлакатдаги “бош ўғри” деб атаганлар. Видеоматериал Лукашенконинг ўзи ҳақида “энг тоза раҳбарман” деб айтган гаплари билан бошланади.
BYPOL берган маълумотга кўра, Қурманбек Бакиев Лукашенкога аталган пулни келини, ўғли Максимнинг аёли Айжан Кененбаева орқали берган. Ана шу пул эвазига бугун Беларусь президентининг гаражида камида 1,4 миллион евро турадиган ўқ ўтмас, ҳатто 15 килограмм тротил портлатганда ҳам зарар кўрмайди деб ҳисобланган “Mercedes-Maybach S600 Pullman Guard” русумли автомобиль пайдо бўлган. Айтишларича, бунақаси ҳатто Владимир Путинда ҳам йўқ экан эмиш.
Бундан ташқари Айжан Кененбаева орқали Беларусь раҳбарига жаҳонга машҳур “Harley-Davidson” русумли мотоцикл ҳам берилгани айтилади. Унинг нархи 26,5 минг долларга баробар. Бакиевлар умумий ҳисобда Лукашенкога 1,6 миллион доллар беришган, деб даъво қилишади суриштирув муаллифлари.
Суриштирув муаллифлари бу совғаларни Александр Лукашенкога собиқ Қирғизистон президенти ўзига кўрсатган марҳамати – ҳомийлиги учун берган, деб даъво қилишмоқда. Маълумки, Бакиев ва унинг ака-укалари 2010 йилдаги апрель тўнтаришидан кейин Қирғизистондан қочиб кетишга мажбур бўлишган. Кўп ўтмай уларни Беларусь президенти Александр Лукашенко ўз паноҳига олган эди. Бугунги кунда Бакиевлар Минскда катта раҳбар лавозимларда ишлаб, катта бизнес билан шуғулланишади.
Қирғизистон бош прокуратураси ва ўз вақтида шахсан президент Алмазбек Атамбаев Бакиевларни Қирғизистонга қайтариб бериш талаби билан Беларусь раҳбариятига бир неча бор мурожаат қилишган, лекин Лукашенко бу талабни доимий равишда қатъий рад этиб келади. Лукашенко Бакиевни ўзининг дўсти деб атаб, давлат тўнтариши йўли билан лавозимидан четлатилган деб ҳисоблайди. Ўзининг рад жавобини асослар экан, у Атамбаев бошқариб турган Қирғизистонни “бандитлар мамлакати” деб атаган эди.
Қурманбек Бакиев ҳам ўзининг бегуноҳ эканини айтиб, ўз лавозимидан ноқонуний равишда четлатилганини айтиб келади. 2010 йилнинг апрелидаги оммавий тартибсизликлар натижасида, жумладан ҳукумат уйини қуролли штурм қилиш вақтида 87 киши ҳалок бўлгани айтилади. Бакиевлар ва ундан кейин ҳокимиятга келган Атамбаев бу қурбонлар учун жавобгарликни бири бирларига юклаб келишади.
Бугунги кунда Америка ва Европа Иттифоқи давлатлари Беларусь президенти Александр Лукашенкони авторитар давлат тузганликда, инсон ҳуқуқлари ва эркинликларини инкор қилиб келаётган давлат раҳбари сифатида ўз лавозимидан кетишини талаб қилиб келмоқдалар. Бу талаб айниқса 2020 йилги президентлик сайловидан кейин кучайган. Ғарб давлатлари ва мухолафатдаги кучлар ўша сайловда мухолафатдаги номзод Светлана Тихановская енгиб чиққан, Лукашенко эса сайлов натижаларини ўз фойдасига бузиб кўрсатган деб ҳисоблашади.
Тихановская сайловдан кейин мамлакатни тарк этиб, ҳозир чет элда яшайди ва мамлакатдаги мухолафатдаги кучларнинг раҳбари сифатида талқин қилинади.
Аталган суриштирувда собиқ куч тизимлари ходимлари Лукашенконинг кимдан ва қанча пора олгани ҳақида батафсил маълумотлар келтиришади. Улар бу маълумотларни қисман давлат Ички ишлар вазирлигининг маълумотлар базасини бузиб кириш орқали олинганини айтишмоқда.
Оқбура, Бишкек.
Сурат интернетдан олинди
