Валентина Чупик онасининг Ўзбекистонга депортация қилинишидан хавотирда
Таниқли ҳуқуқ ҳимоячисининг ўзи яқинда Россиядан бадарға қилиниб, Арманистонга кетишга мажбур бўлган.
Эслатиб ўтамиз, асли ўзбекистонлик бўлган ҳуқуқ фаоли, «Tong Jahoni» инсон ҳуқуқлари ташкилоти раҳбари, 48 ёшли Валентина Чупик 25 сентябрь тунида Арманистонга бўлган хизмат сафаридан Москвага учиб келганда Шереметьево аэропортида ушланган эди. Чупикка унинг қочқинлик мақоми бекор қилингани ва унга 2051 йилгача Россияга кириш тақиқланганини расман эълон қилишган.
У 7 кун мобайнида аэропортда ушлаб турилгач, 2 октябрь куни Шереметьево аэропортидаги махсус ҳибсхонадан озод қилинган ҳамда Арманистонга учиб кетган эди.
Чупик қарийб 15 йил мобайнида асосан Марказий Осиё давлатларидан чиққан мигрантларнинг ҳақ-ҳуқуқларини ҳимоя қилиб келган эди. У мигрантлар орасида жуда машҳур бўлиб, телефон рақамини мигрантлардан осонгина сўраб топиш мумкин бўлган.
Марказий Осиё янгиликлар хизмати берган маълумотга кўра, куни-кеча Чупик Москва вилояти полицияси 85 ёшли онасини Ўзбекистонга депортация қилиши мумкинлигини айтиб ҳавотир билдирган. Чупикнинг Озодлик радиосига ёзган мактубида айтилишича, полиция унинг онасига Россияда бўлиш муддатини бузгани учун судга чақиртирилганини ва Егорьевск шаҳридаги хорижликларни вақтинча сақлаш маркази орқали Ўзбекистонга депортация қилинишини маълум қилган.
Чупик онасининг биринчи гуруҳ ногирони экани ва судга боришга қийналишини ҳамда хорижликларни сақлаш марказида яшай олмаслигини айтган. Шу вақтнинг ўзида Чупик Россия қонунчилигига кўра, ёши 70 дан ошган шахслар мамлакатдан маъмурий тарзда чиқариб юборилмаслиги лозимлигини ҳам таъкидлаган.
Валентина Чупик ва унинг онаси Ўзбекистон фуқароларидир. Улар 2005 йилдан буён Россия ҳудудида яшаб келишаётган эди.
Оқбура, Бишкек
Расм centralasian.org
