Мигрантларнинг ҳимоячиси Валентина Чупикни Россияга киргизишмади
Россия ҳукумати унга ўттиз йилгача мамлакат дарвозаларини ёпгани маълум бўлди. Нега?
«Тонг Жаҳони» номли ҳуқуқни ҳимоя қилиш ташкилоти раҳбари Валентина Чупик 25 сентябрь, шанба куни кечқурун Москвадаги Шереметьево халқаро аэропортида қўлга олинган. У Арманистонга бўлган иш сафаридан қайтиб келаётган эди.
Паспорт назорати пунктида куч тизимлари ходимлари унга мамлакатга кириш тақиқланганини маълум қилишди. Бўлганда ҳам нақ 30 йилга! Унинг қочоқ мақоми бекор қилингани ҳам маълум бўлди.
Хўш, бу аёл нега кутилмаганда Россия давлати учун ёқимсиз шахсга айланиб қолди?
Валентина Чупик асли ўзбекистонлик, кўп йиллардан бери Россияда яшаб у ердаги мигрантлар ҳуқуқини ҳимоя қилиб келарди. Бу аёл ёрдамида Марказий Осиёдан чиққан минглаган меҳнат мигрантлари ўзларининг муаммоларини ҳал қилиб келаётган эди.
Чупикнинг исми мигрантларга жуда яхши маълум бўлиб, унинг телефон рақамини минглаган мигрантлар яхши билишади. Ноқонуний ҳибсга олиш, ойлик маошини беришдан бош тортиш ёки шунга ўхшаган ҳолатларда Валентина Чупик ва унинг сафдошлари дарров ёрдамга келишарди. Бунга ўзим шахсан гувоҳ бўлганман.
Ўтган йили Екатеринбург шаҳрида ишлаётган бир ўзбекистонлик танишим қурилиш компаниясидан 7 ойлик иш ҳақини ололмаётганини айтиб қолди. Россиядаги танишларга қўнғироқ қилиб, маслаҳат сўрасам, дарров Валентина Чупикнинг телефон рақамини беришди.
Қўнғироқ қилсам, Чупик ўзининг Москвада экани, лекин Екатеринбургдаги ҳамкасблари сўзсиз ёрдам беришини айтди. Орадан бир ҳафта ўтиб, бояги танишим, фақат угина эмас, бошқа ўнлаб мардикорлар ҳам ўша компаниядан ўз ойлик маошларини ола бошлаганини айтди.
“Истаган жойингга бориб арзлан”, деб ҳаммани ишдан ҳайдаётган компания раҳбарлари уларни қайта ишга чақириб, икки-уч ойда барча қарзларини тўлаб беришга ваъда қилибди. Кейин тўлаб беришди ҳам.
Суриштирсам, полиция ва Миграция хизматининг виждонсиз, таъмагир ходимлари Чупикнинг номини эшитганда саросимага тушиб қолишар экан. Чунки юқори давлат идораларида бу аёлнинг сўзи ўтар, унинг мурожаатларига дарров жавоб бериларди экан.
Хуллас, ижтимоий тармоқларда кўпчиликнинг ёзишича, ҳуқуқ ҳимоячисидан зериккан куч тизимларидан кимдир унинг “овозини ўчириш” амалини топган. Экспертларнинг тахмин қилишича, Валентина Чупик шу кунларда мажбурий равишда ватанига, Ўзбекистонга чиқариб юборилади.
Валентина Валентиновна Чупик 2005 йилги Андижон воқеаларидан кейин қочоқ мақомини олиб, Россия пойтахтида яшаб, ҳуқуқ ҳимоячиси сифатидаги фаолиятини давом этдириб келаётган эди. Умид қиламизки, у депортация қилинган тақдирда бугунги янгиланаётган Ўзбекистонда юртдошларимизнинг ҳимоячисига яхши муомала қилинади ва у энди ўз юртида туриб, меҳнат мигрантлари муаммоларини ҳал қилишда давом этади.
Абдумўмин Мамараимов, Оқбура, Бишкек.
Сурат Фергана сайтидан олинди
