БАЙРАМ БАЙРАМГА УЛАНИБ…
Қорасув тумани, Буюк ғалаба санаси ва Чингиз Айтматов мактаби ютуқларининг бир байрамда намоён бўлиши
Куни кеча Қорасув туманининг Зарбдор қишлоғида шукуҳли бир тантана бўлиб ўтди. Бунга сабаб – Қирғизистондаги энг катта ҳисобланган Қорасув тумани ташкил топганининг 90 йиллиги, Улуғ Ватан урушида қозонилган ғалабанинг 80 йиллиги ҳамда Зарбдор қишлоғидаги Чингиз Айтматов номли 69- мактабнинг 80 йиллиги муносабати билан ўтказилган кенг кўламли тадбир бўлди. Бу уч тарихий сана нафақат туман, балки бутун мамлакатимиз эли учун фахр туйғуси сифатида кутиб олинди.
Тадбирда Жогорку Кенеш депутати Алишер Қозуев, Қорасув тумани давлат маъмурияти бошлиғи Қанатбек Табалдиев, Қорасув тумани халқ таълими мудири Эмилбек ўғли Талантбек ва бошқалар қатнашди.
Мактаб директори Авазбек Ҳожибуваев анжуманни очар экан, жумладан шундай деди:
“Бугун биз нафақат Қорасув туманининг 90 йиллик шонли тарихи, балки бутун халқимиз учун унутилмас бўлган Улуғ Ватан урушида қозонилган ғалабанинг 80 йиллиги ва мактабимизнинг 80 йиллик фаолиятини нишонлаш учун тўпландик. Чингиз Айтматов номидаги 69-мактаб ўзининг маънавий-тарбиявий ишлари, илғор педагогик ютуқлари билан нафақат туман, балки вилоят миқёсида ҳам ўрнак бўлиб келмоқда. Бугунги тадбир – авлодлар давомийлиги, фахру ғурур ва меҳнатсеварлик рамзидир.”
Тадбир доирасида мактаб ўқувчилари томонидан тайёрланган бадиий чиқишлар, ғалаба кунига бағишланган театрлаштирилган саҳналар ва мактаб фаолиятига оид кўргазмалар намойиш этилди. Туманнинг уруш ва меҳнат ветеранлари, таълим тизими фидоийлари тақдирланди. Тадбир қатнашчилари бу кунни унутилмас бўлганини таъкидлашди.
Қорасув тумани 1935 йилда тузилган бўлиб, ўтган қарийб бир аср мобайнида Қирғизистоннинг жанубидаги стратегик аҳамиятга эга ҳудуд сифатида барқарор ривожланиб келмоқда. Қишлоқ хўжалиги, саноат, таълим, тиббиёт соҳаларида эришилган ютуқлар туман аҳлининг фидоий меҳнати, ҳамжиҳатлиги ва замонавий бошқарув усуллари самарасидир.
Зарбдорда ўтказилган асосий байрам тадбирида Жогорку Кенеш депутати Алишер Қозуев сўзга чиқиб шундай деди:
“Қорасув — бу фақат географик нуқта эмас. Бу — бизнинг умумий тарихимиз, бирдамлигимиз, меҳнаткашлигимиз ва келажакка бўлган ишончимиздир. Бугун биз нафақат ўтмишни ёдга оляпмиз, балки келажак авлод учун намуна яратяпмиз.”
Тадбир давомида туманнинг 90 йиллик тараққиёти акс этган фотокўргазмалар, маҳаллий ҳунармандлар ярмаркаси ҳам ташкил этилди.
Қорасув туманидан Улуғ Ватан уруши фронтига юзлаб фидоийлар жўнаб кетган. Уларнинг кўпчилиги ҳалок бўлди, анчаси ярадор бўлиб қайтди, яна бир қисми эса урушдан кейин ҳам юрт учун хизмат қилишда давом этди. Уларнинг жасорати бугунги тинч ҳаётимизнинг асоси сифатида қадрланади.
69-мактабда ушбу сана муносабати билан ташкил этилган “Хотира дарслари”, “Уруш фарзандлари — тинчлик элчилари” мавзуидаги давра суҳбатлари ёшлар учун ниҳоятда мароқли бўлди. Унда мактаб фаолларидан бири, ўзбек тили ва адабиёти ўқитувчиси Сурайё Мирзараҳимова:
“Биз ўрганаётган дарслигимиздаги тинчлик ва эркинлик – бу осмондан тушган неъмат эмас, – деб таъкидлади. – Бу – урушда ҳалок бўлган, ҳаётини фидо қилган боболаримизнинг меросидир. Шунинг учун ҳам бу сана фақат тарих эмас, балки тирик ибратдир.”
Чингиз Айтматов номидаги 69-мактаб 1945 йилда ташкил этилган бўлиб, бугунги кунда 1100 нафардан зиёд ўқувчига таълим-тарбия бераётган замонавий таълим масканидир. Мактаб 80 йил давомида минглаб билимли, ташаббускор ва маънавиятли ўқувчиларини ҳаётга учирма қилди.
Юбилей тадбирлари муносабати билан мактабда “Маърифатнинг 80 йили” номли кўргазма, “Илм – тараққиёт калити” мавзусида илмий амалий конференция ҳамда “Битирувчилар учрашуви” ташкил этилди. Унда мактабни 1970, 1985, 2000 ва 2010 йилларда тугатган турли соҳа вакиллари иштирок этиб, ўз хотиралари ва муваффақиятларини ўртоқлашдилар.
Қорасув тумани халқ таълими мудири Эмилбек ўғли Талантбек тадбирда сўзга чиқиб қуйидагиларни тўлқинланиб айтиб ўтди:
“Бу мактаб наинки билим ўчоғи, балки инсонпарварлик, меҳр ва юртга садоқат руҳида тарбия берадиган муқаддас маскандир. Бугун мактабнинг 80 йиллигини бутун туманда нишонлашимиз – биз учун улкан шараф.”
Қорасув туманининг 90 йиллиги, Улуғ Ватан урушида қозонилган ғалабанинг 80 йиллиги ҳамда Чингиз Айтматов номидаги 69-мактабнинг 80 йиллиги – ҳар бири алоҳида таркибий қисм сифатида халқни бирлаштирадиган, ўтмишдан ибрат, келажакка ишонч бағишлайдиган муҳим воқеалардир. Бу каби тадбирлар халқнинг тарихий хотирасини тиклайди, янги авлодда ўзлигини, ватанга муҳаббат ва юксак масъулият туйғусини шакллантиради.
Маълумот ўрнида айтиб ўтиш керакки, “Ўш-Қорасув» йўли бўйида жойлашган мазкур мактаб 1945 йилда ташкил этилган бўлиб, дастлаб Леонид Андреев номи билан юритилди. 1947 йилга келиб мактабга Наримонов номи берилди. 2005 йилдан бошлаб Чинггиз Айтматов номи билан юритилади.
Мактаб 1949 йилда янги ғиштли бинога кўчди. 1971 йил Ленин колхозининг Зарбдор участкасида янги мактаб биноси қурила бошланди ва 1972 йилда фойдаланишга топширилди. Мактабда таълим ўзбек тилида олиб борилган. Унда саксон тўрт ўқитувчи фаолият кўрсатиб келмоқда. Улардан йигирма олти нафари олий, йигирма бир нафари биринчи тоифа ва етти нафари халқ таълими аълочиларидир. Ҳар бир ўқитувчи ўқувчиларга таълим-тарбиянинг янги йўналишлари устида тинмай изланиб, билим бермоқдалар. Мактабни битирган собиқ ўқувчилар халқ хўжалиги, тиббиёт соҳаларида ва бошқа тармоқларда меҳнат қилмоқдалар.
Одилжон Дадажонов
