Ўшлик милиция сержанти Аброр Ҳакимов иккинчи бор Осиё чемпиони бўлди
ьБунгача форма кийган спортчимиз Жаҳон ва Европа чемпионатларида ҳам олтин медални қўлга киритган.
Ўш шаҳар ички ишлар бошқармаси патруль-пост хизмати инспектори, 27 ёшли милиция сержанти Аброр Ҳакимов кикбоксинг бўйича Осиё чемпионатида олтин медални қўлга киритди. Хабар қилинишича, чемпионати Камбоджанинг пойтахти Пномпень шаҳрида бўлиб ўтмоқда. Мусобақалар 3 октябрда бошланиб, 18 октябрга қадар давом этади.
Аброр Ҳакимов 71 килограммгача бўлган вазнда мусобақаларнинг “Лоу кик” йўналишида иштирок этди ва энг яхши натижага эришди. Ҳаммаси бўлиб у 4 та жанг ўтказди ва ҳаммасида ғалабага эришди. Аввал Хитой спортчисига, кейин эронлик спортчи, учинчи жангда эса вьетнамлик рақибига қарши курашдан сўнг финалда Қозоғистон вакилини 2:1 ҳисобида мағлуб қилди.
Осиё чемпионатида 26 давлатдан спортчилар иштирок этмоқда. Қирғизистон шарафини Ҳакимовдан ташқари яна икки кикбоксчи ҳимоя қилмоқда. Адилет Улан уулу ва Азамат Кудайбердиевлар бронза медалини қўлга киритишди.
Маълум бўлишича, қаҳрамонимиз ўтган йили Саудия Арабистонининг Ар-Риёд шаҳрида ўтказилган Жаҳон қўл жанги санъати мусобақаларида ҳам олтин медаль соҳиби бўлган экан. Россияда илк бор чемпионлик номини олган спортчи 2015 йилда Италияда ўтган Жаҳон чемпионатида ҳам ғалабани қўлга киритган. Шундан сўнг, 2016 йилда Германияда ўтган беллашувда Европа чемпионлигини енгиб олган. 2018 йилда Иссиқкўлда ўтказилган Осиё биринчилигида ҳам ғолиблар камарини қўлга киритган.
Аброр 1997 йил йилда Ўш вилоятининг Наримон қишлоғида, зиёлилар оиласида туғилган. Онаси мактабда ўқитувчи, дадаси қишлоқда агроном бўлиб ишлаган. 2015-2016 йилларда ватан олдидаги бурчини бажариб, ҳарбий хизматни ўтаган. Кейин РГСУнинг ҳуқуқшунослик факультетини битирган. Ўқишдан сўнг танлов асосида Ўш шаҳар ички ишлар бошқармасига ишга киради.
Саккиз ёшидан спортнинг таэквандо тури билан шуғулланган ўзбек ўғлони, аввалига катта-кичик турнирларда иштирок этиб, 2014 йилдан буён жаҳон миқёсидаги турли мусобақаларда қатнашиб келади.
“Спортга киришимга дадам сабабчи бўлган. Илк мусобақаларимга ўзи етаклаб олиб борар эди. Оиламиздан спортчилар чиқмаган. Аммо отам спорт ишқибози эди. Шунинг учун ҳавас қилиб, мени қўллаб-қувватлаган”, – дейди чемпион.
Биз Аброрга спортда ва ишларида ҳам, улкан муваффақиятлар, оилавий бахт ва омад тилаб қоламиз.
Оқбура, Бишкек.
Расмлар муаллифи – УМК
