Олимпиада-2024: Мунарбек финалда, Айсулуу ярим финалда, Бекзат бронза учун курашади
Аввалдан кутилганидек, Олимпиада ўйинларининг охирги кунлари қирғизистонликлар учун жуда ҳаяжонли кечмоқда.
Албатта, энг биринчи, қувончли ва тарихий воқеа – боксчи Мунарбек Сейитбек уулунинг финалга чиқиши бўлди. Бу – мустақил Қирғизистон тарихида биринчи бор қирғиз боксчиси кумуш медал олди деган гап. Лекин ҳали олтин медалга ҳам умид бор. Бу спортчининг олимпиададаги чиқишлари Қирғизистон ва Ўзбекистондаги спорт мухлисларига ҳар қандай олтин ёки кумушдан ҳам муҳимроқ нарсани берди. Икки қардош халқ, тили ва дили, бозори ҳам мозори ҳам бир ўзбек билан қирғиз анчадан бери бири-бири учун бу қадар қувониб, ўзаро меҳрга тўла сўзларни айтишмаган эди.
Мунарбекка икки бора, чорак ва ярим финалда секундантлик қилган ўзбекистонлик мураббий Акмал Хасанов, табиийки финалда Мунарбекнинг ёнида бўлолмайди. Чунки финалда унинг янги дўсти ўзбекистонлик боксчи билан рингга тушади. Бу ерда манфаатлар тўқнашувидан ташқари этика масалалари ҳам бор. Лекин Хасановнинг қалбининг бир чети билан Мунарбекни ҳам қўллаб туришига шубҳа йўқ. Чунки қирғизистонлик спортчи билан ўзбекистонлик мураббий бир неча кундан бери тиллардан тушмаяпти ва ўзаро қадрдонлашиб улгуришди.
Финалда Мунарбек 11 август куни ўзбекистонлик рақиби Абдумалик Ҳалоков билан рингга тушади.
Иккинчи қувончли хабар – қирғизистонлик курашчи қизларнинг пешқадами Айсулуу Тинибекова аввалги икки курашда ғалаба қозониб ярим финалга чиқди. Мухлислар бу тажрибали спортчининг олтин ёки кумуш медалга сазовор бўлишини кутишмоқда.
Яна бир спортчи Бекзат Алмаз уулу бронза учун курашадиган бўлди. Афсуски, яна бир курашчи Айаал Лазарев биринчи курашни бой бериб, ўйиндан чиқди.
Бунгача қирғизистонлик полвонлардан Жўламан Шаршенбеков бронза, Мээрим Жуманазарова кумуш медални қўлга киритишган. Ҳозирча қирғизистонлик олимпиадачилар ҳисобида 3 бронза ва 1 кумуш медал бор. Биринчи ва балки ҳали ҳам умид қилинаётган ягона олтин медални ким оларкин?
Умуман олимпиаданинг охирги кунлари Қирғизистон спортчилари учун натижали бўлиши кутилмоқда. Чунки курашчи қизлардан Айсулуу Тинибекова ва Айпери Медет қизи медалларга даъвогар спортчилардан. Айниқса Айсулуу. Токиода ўтган олимпиадада кумуш медал олган бу спортчидан олтин медал кутаётганлар кўпчиликни ташкил қилади. Яна бир курашчи Амантур Исмаилов ҳам бронза учун кураш ҳуқуқини қўлга киритганини ҳисобга олсак, ҳали олдинда иш кўп.
Қирғизистонлик спортчилар иштирокидаги мусобақалар жадвали қуйидагича:
Эрназар Акматалиев (эркин кураш, 65 килограммгача)
10 август, 15.30 — 1/8 финал;
10 август, 16.50 — 1/4 финал;
10 август, 22.15 — ярим финал;
11 август, 16.25 — финал.
Айсулуу Тинибекова (аёллар кураши, 62 килограммгача)
9 август, 22.55 — ярим финал;
11 август, 01.15 — финал;
Айпери Медет қизи (аёллар кураши, 76 килограммгача)
10 август, 15.30 — 1/8 финал;
10 август, 16.50 — 1/4 финал;
10 август, 22.55 — ярим финал;
11 август 17.45 — финал.
Сардана Трофимова (марафон)
11 август, 12.00.
Биз Қирғизистон ва Ўзбекистон спортчиларига олдинда турган мусобақаларда омад ва зафарлар тилаймиз!
Оқбура, Бишкек.
Расм интернетдан олинди
