Кўзи очиляптими? Исроил бир ҳафтага ўт очишни тўхтатишни таклиф қилди. Лекин…

ҲАМАС ташкилоти бу таклифни рад этиб, уруш ҳаракатларини бутунлай тўхтатиш талабини қўйди.

Исроил ҳукумати ҲАМАС билан музокараларда воситачилик қилаётган Миср ва Қатар орқали бир ҳафтага ўқ отишни тўхтатиб, бунинг эвазига ҲАМАСдан яна 40 кишини гаровдан бўшатишни талаб қилган. Axios агентлигининг ўз манбаларига таяниб хабар беришича, Исроил бунинг эвазига оғир жиноятларда айбланиб, ўз қамоқларида ушлаб турган бир қатор фаластинликларни озод қилиши мумкинлигини билдирган.

Бунга жавобан ҲАМАС гаровдагиларни озод қилиш юзасидан музокараларни бошлаш учун Исроил ўт отишни тўхтатиши лозим, деган шартни қўйган. “Ўқ отиш тўла тўхтатилмагунича, ҳеч қандай [гаровдагиларни қамоқдагиларга] алмашув бўлмайди”, деган ҲАМАС раҳбарияти.

Американинг Wall Street Journal газетаси тарқатган маълумотга кўра, ҲАМАС раҳбари Исмоил Хания икки ўртада қандайдир музокара бошлаш учун Исроил ўт очишни тўла тўхтатиб, ўз қўшинларини Ғазодан олиб чиқиб кетиши кераклигини айтган. Шунда ҳам Исроил ўз қамоқларида ётган барча фаластинлик маҳбусларни озод қилиши керак бўлади.

Охирги пайтларда турли манбаларда Исроилнинг Ғазодаги урушда катта талофатлар кўраётгани айтила бошлади. Буни Исроил тан олмасада, катта даражадаги яҳудий зобитнинг катта йиғилишда, “Биз ҳар беш дақиқада биттадан солдат йўқотяпмиз”, деган гаплари интернетда тарқалиб кетган. Агар бу гап рост бўлса, Исроил 1 соатда 12 нафар, 10 соатда (тахминий қилиб айтганда бир кунда) 120 нафар солдатини йўқотмоқда. Бу бир ойда 3500 дан кўпроқ дегани.

Расмий Исроил бугунги кунгача Ғазода 100дан ортиқ аскарини йўқотганини айтиб келмоқда. ЦАХАЛ номи билан машҳур бўлган Исроил армияси Ғазога осмондан энг замонавий қирувчи ва бомбардимон учоқлардан, сувда ҳарбий кемалардан, қуруқликда эса энг кучли дейилган танк ва ракеталардан фойдаланиб тинимсиз ҳужум уюштирмоқда.

ЦАХАЛнинг юз минглаб тиш-тироноғигача қуролланган аскарларига ҲАМАСнинг 20-30 минг нафар атрофида, баъзида ҳарбий ҳимоя кийимларисиз, фақат енгил қуроллардан фойдаланган жангчилари қарши туриб келмоқда. Исроил армияси шу кунга қадар ҲАМАСнинг йирик бир гуруҳи ёки раҳбари йўқ қилингани ҳақида ишончли далилларга асосланган маълумотлар бера олганича йўқ.

Ғазо ҳимоячилари кутилмаганда минглаб чақиримга чўзилган ерости йўллардан, турли пистирмалардан чиқиб келиб, исроилликларга қақшатқич зарбалар бермоқдалар.

Исроилнинг аламзада ҳарбий раҳбарияти жазаваси тутиб, касалхона ва қочқинлар лагерларини ҳам аямай ўққа тутишмоқда. Оқибатда тинч аҳоли орасида ўлганлар сони 20 минг кишига яқинлашди. Уларнинг 70 фоизи ёш болалар ва аёллар экани айтилмоқда.

Албатта, бутун дунёга “Ҳамасни таг-томири билан йўқ қиламиз”, “Ғазони култепага, чўлга айлантирамиз”, деб баёнотлар берган Исроил генераллари ҲАМАСнинг талабларини қабул қилмадилар. Исроилнинг “Моссад” номли разведка хизмати раҳбари Давид Барнеа, ҲАМАС урушни тўхтатмоқчи бўлса, таслим бўлиши ва 7 октябрда Исроилга уюштирилган ҳужум учун жавобгар бўлган раҳбарларини топшириши кераклигини айтган.

Афтидан, бутун жаҳон ҳамжамиятининг босими остида қолган Исроил урушда кўзланган мақсадларига эриша олмаслигига кўзи етиб қолди. Чунки ҲАМАСни тўла йўқ қилиш учун Исроил бу ташкилот раҳбарларига барча шароитларни тузиб берган Қатарга, “ҳамасчиларни” қўллаб турган Эрон, Туркия каби давлатларга қарши ҳам уруш очиши керак бўлади.

Хуллас, бу урушда Исроилнинг ютқазиши ҳақида башорат қилган кўплаб экспертларнинг гапи тўғри эканига ишонч ҳосил қилинадиган кун яқинлашаётган кўринади. Шундай бўлсин.

Муҳими, Исроилнинг тинчлик ҳақидаги таклифининг рад этилиши ўз ватанини ҳимоя қилаётган ҲАМАС раҳбарияти ва жангчиларининг руҳи ҳали анча тетик, иродаси букилмас эканини кўрсатиб қўйди. Ва аксинча, ўзининг босқинчи давлат эканини очиқ тан олмасада, ичидан ҳис қилиб, бу ҳақда бутун дунё ҳамжамиятидан таъналар эшитиб келаётган Исроилни руҳи чўкиб бораётгани аниқ.

Эслатиб ўтамиз, ноябр охирида ҲАМАС билан Исроил ўртасидаги келишувга асосан 5 кунлик тинчлик эълон қилиниб, ҲАМАС гаровга олган исроилликлардан 105 нафари бўшатилган эди. Бунга жавобан Исроил 150 нафардан ортиқ фаластинликни қамоқхоналардан озод қилган.

Гаровдан бўшатилганларнинг аксарияти ҲАМАСчиларнинг уларга нисбатан яхши муносабатда бўлганини айтишмоқда. Интернетда озод қилинган гаровдагиларнинг ҲАМАС аскарлари билан жилмайиб, қўл силкитиб, дўстона хайрлашаётгани тасвирланган видеоларни кўриш мумкин.

Исроил қамоқхоналаридан бўшатилган фаластинликларнинг кўпчилиги эса, аксинча, ҳибсда қийноққа олинганлари, турли усуллар билан таҳқирланганлари ҳақида айтиб, бунинг исботи сифатида таналаридаги жароҳат ва уларнинг изларини кўрсатмоқдалар. Бу мавзуда ҳам интернетда етарлича видео ва фотосуратлар мавжуд.

Оқбура, Бишкек.

Расм интернетдан олинди.