Қамчибек Ташиев: Матраимов мамлакатда қолгиси келса, кичкина “Матиз” миниб юриши керак
Қирғизистонда коррупция ва мафияга алоқадорликда айбланган икки юздан ортиқ ходим ишдан бўшатилган.
Қирғизистон Миллий хавфсизлик давлат қўмитаси (МХДҚ) раиси Қамчибек Ташиев 2 ноябр куни Чуй вилоятининг Кемин туманида ўтказилган тадбирда 200 дан ортиқ давлат хизматчиси мафия билан ишлагани учун ишдан ҳайдалганини маълум қилди.
Жумладан унинг айтишича, Божхона хизмати раисининг собиқ ўринбосари, мамлакатнинг энг бой кишиларидан бири ҳисобланган Райимбек Матраимовга алоқадор бўлган 90дан ортиқ давлат хизматчиси ва таниқли ўғрибоши, марҳум Қамчи Кўлбаевнинг одами ҳисобланган 60 нафар давлат ходими борлиги аниқланган.
Умумий ҳисобда бугунги кунгача 200 дан ортиқ давлат хизматчиси шу сабаб билан ишдан бўшатилган. Ташиев энди жиноий гуруҳларга алоқадор бирорта кимсанинг давлат муассасаларида ишламаслигини айтди.
“Бундан буён мамлакатда Кўлбаев мафияси, Матраимов мафияси деган нарса бўлмайди. Райим Матраимов, агар у мамлакатда юрадиган бўлса, кичиккина «Матиз» миниб юриши керак. Бундан буён Райим Матраимовнинг тўдаси ва ноқонуний йўллар билан топган бойлиги мамлакат тараққиётига тўсқинлик қилиб, бизнинг ички сиёсатимизга халақит бера олмаслиги керак”, – деди Ташиев.
Эслатиб ўтамиз, Давлат Божхона хизмати раиси ўринбосари Райим Матраимов коррупцияда айбланиб, қамоққа олинган. Сўнгра айбини бўйнига олиб, давлат фойдасига 2 миллиард сўм (22,4 млн. доллар атрофида) тўлагач, жиноий жавобгарликдан озод қилинган эди. Ҳозир унинг қаерда ва нима иш билан машғул экани ноъмалум.
Матраимовга қарши қоралаш ишлари бошлангач, 2019 йили ҳали давлат хизматига келмаган Қамчибек Ташиев унинг тарафини олиб гапирганини “Кактус” нашри ёзиб чиқди. Ўшанда “Азаттиқ” радиоси журналистик суриштирув ўтказиб, Матраимов тузган коррупция тизими Қирғизистондан 700 миллион долларни ташқарига олиб чиқилганини эълон қилган эди.
Шунда Қамчибек Ташиев Матраимовнинг ўта катта лавозимларни эгалламаган оддий фуқаро эканини, уни даҳшатли маҳлуқ сифатида кўрсатавериш керак эмаслигини айтган.
“У оддий, яхши, ишбилармон йигит. Уни жўндан жўн давлат миқёсида қоралаш мумкин эмас. Агар чинданам фактлар бўлса, ҳуқуқ-тартибот органлари чора кўришлари керак. Коррупцияни тугатмагунимизча, биз тараққиётга эриша олмаймиз”, – деган эди ўшанда Ташиев “Азаттиқ” радиосининг кўрсатувларидан бирида.
Афтидан тақдир аниқланган фактлар билан шуғулланиб, Матраимовга нисбатан қатъий чора кўришни Ташиевнинг елкасига юклаган экан шекилли.
Махсус хизмат раиси Кемин туманида қурилган МДХҚ бўлимининг янги биноси очилишидаги бу нутқида мафияга алоқадорлиги аниқланган амалдорлар ичида МХДҚ ходимлари ҳам бўлганини тан олиб, уларнинг пул эвазига мафия хизматини қилиб юрганини айтди.
Эслатиб ўтамиз, Қирғизистон махсус хизмати ходимлари жорий йилнинг 4 октябри куни Бишкекда ўтказган махсус амалиётда таниқли ўғрибоши Қамчибек Кўлбаев ўлдирилган эди. У мамлакатдаги энг кучли уюшган жиноий гуруҳ бошлиғи сифатида Қирғизистон ИИВ рўйхатида турган.
АҚШ 2012 йилда уни йирик наркобарон сифатида “қора рўйхат”га киритган. АҚШ Давлат департаменти Кўлбаевни жазога тортиш, у етаклаган жиноий гуруҳнинг молиявий тизимини йўқ қилишга ёрдам берувчи маълумот учун аввалига 1 млн., кейинроқ 5 миллион доллар мукофот ваъда қилган.
Бунга қадар Қирғизистонда мафияга, коррупцияга ва уюшган жиноятчиликка қарши кураш ҳақида кўп сиёсий баёнотлар берилган. Бу борада катта давлат дастурлари қабул қилинган, лекин амалий иш қилинмаган, бу қадар кенг кўламдаги кураш олиб борилмаган эди. Сўнгги йилларда бу кураш натижаси ўлароқ давлат хазинасига миллиардлаб доллар қўшимча маблағ тушмоқда.
Оқбура, Бишкек.
Расм интернетдан олинди
