Тез фурсатда: Ўзбекистон ўз гибрид ва электр автомобилларига эга бўлади
Янги заводда нафақат автомобил, балки унинг эҳтиёт қисмлари ҳам ишлаб чиқариладиган бўлади.
Ўзбкистон Сармоялар, саноат ва савдо вазирлигининг хабар беришича, 26 сентябрь куни вазирлик ва Хитойнинг машҳур BYD компанияси ўртасида «Ўзбекистонда гибрид ва электр автомобиллар ва уларнинг бутловчи қисмларини ишлаб чиқаришни ташкил қилиш» ҳақида йирик сармоя битими имзоланди.
Бундан сал аввал Ўзбекистон президенти Шавкат Мирзиёев BYD компаниясининг президенти ва асосчиси Ван Чуаньфу бошчилигидаги делегацияни қабул қилган эди.
Давлат раҳбарининг матбуот хизмати берган хабарга кўра, учрашувда компаниянинг Ўзбекистондаги фаолиятини кенгайтиришнинг амалий жиҳатлари, хусусан, Жиззах вилоятида гибрид ва электр автомобиллар ишлаб чиқаришни тез фурсатда йўлга қўйишга келишиб олинди. Кейинги босқичларда заводнинг қувватини йилига 300 минг дона автомобил ишлаб чиқаришга етказиш масаласи кўрилди.
Саноат ва савдо вазирлигининг хабар беришича, битим асосида BYD Auto компанияси ва «Ўзавтосаноат» томонидан мамлакатда гибрид ва электр автомобиллар ишлаб чиқарувчи BYD Uzbekistan Factory қўшма корхонаси ташкил этилади. Маълумки, BYD компанияси дунёда электр автомобиллари ишлаб чиқарувчи энг йирик ва етакчи корхона ҳисобланади.
Жаҳондаги автомобил компаниялари рейтингида биринчи ўринни эгаллаган BYD компанияси йилига дунё бўйлаб 230 мингга яқин автомобил сотади ва бу рақам тинимсиз ўсиб бормоқда. Машҳур Тесла машиналари иккинчи ўринда (134 минг), учинчи ўринни GAC Aion машиналари (45 мингдан кўпроқ) эгаллаб турибди.
Германиянинг “Мерседес” бренди БМВ ва Фольксвагендан ҳам ортда қолиб, еттинчи ўринга тушиб кетган.
Мамлакат ва компания президентлари учрашуви чоғида маҳсулот таннархини камайтириш учун автомобил бутловчи ва эҳтиёт қисмларини шу ерда ишлаб чиқаришга ҳамда автомобилларни учинчи мамлакатларга экспорт қилиш масаласига алоҳида эътибор қаратилди.
Шунингдек, мамлакатга BYD электробусларини етказиб бериш ва уларга хизмат кўрсатиш бўйича муҳандислик-хизмат кўрсатиш марказларини очиш режалари қўллаб-қувватланди.
Ўзбекистон – Совет Иттифоқи тарқаб кетгандан кейин ўз автомобил саноатини бунёд қилиб, дунёдаги автомобил ишлаб чиқарувчи давлатлар қаторидан ўрин олган ягона давлат.
Ўзбек автомобилларининг асосий харидорлари қаторида Россия ҳам бўлиб, унинг “Волга”, “Жигули” ва “Москвич” каби русумлардаги машиналари ҳамон дунё миқёсидаги рақобатчи даражасига чиқолмай келади.
Оқбура, Бишкек.
Расм интернетдан олинди
