Эски танишлар: Париж олимпиадасида ўзбек мураббийи қирғиз спортчисини қўллади

Илк бор олимпиадага қатнашаётган Мунарбек ярим финалда ҳам ўзбекистонлик мураббийдан самимий ёрдам олади.

Қирғизистонлик боксчи Мунарбек Сейитбек уулу 57 килограммгача вазн тоифасида Париж Олимпиадасида ярим финалга чиқди. Бу билан у ўзига камида бронза медалини таъминлаб қўйди. Агар омади чопса, кумуш, ҳатто олтин медал ютиб олиши мумкин.

Биринчи бор олимпиадага қатнашаётган ўшлик йигитнинг бу ғалабаси интернет тармоқларида энг кўп тилга олинаётган воқеалардан бири бўлиб қолди. Бунга унинг шахсий тренери Беганас Султанбаевнинг Парижга бормай қолгани ва спортчига ўзбекистонлик мураббийнинг секундантлик қилгани ҳам сабаб бўлди.

Интернетда кенг тарқалган видеода Беганас Султанбаевнинг ўз шогирди жангини телевидение орқали кўриб ўтиргани, ғалабасидан сўнг йиғлаб юборгани акс этган. Бу кўплаган спорт мухлисларини ҳам тўлқинлантириб, ҳам ранжитди, нега мураббий Парижга бормай қолгани ҳақида баҳс авж олди. Миллий олимпия қўмитаси расмийлари бу ҳолатни мураббийларга аккредитация бериш март ойида тугагани, Мунарбек эса олимпиадага йўлланмани кейинроқ олгани билан изоҳлашди.

Мухлислар ҳатто мураббийга чипта олиб, кечроқ бўлса ҳам Парижга жўнатишни таклиф қилишди, ҳомийлик қилишни истаганлар ҳам топилди. Лекин виза олиш бир ҳафта вақт талаб қилиши ва унгача олимпиада ўйинлари ҳам ниҳоясига етиши ҳисобга олиниб, бу таклиф таклифлигича қолди. Беганас Султанбаевнинг уйи йўқлиги, оиласи билан ётоқхонада яшаб юриши маълум бўлгач, унга квартира олиб бериш масаласи кўтарилди. Бу масала тезда ҳал бўлиб, мамлакат президенти томонидан унга икки хонали квартира тақдим этилди.

Лекин Мунарбек Парижда ёлғизлаб қолмади ва тарихий ғалабага эришиши учун қўллов топа олди. У 3 август куни чорак финал баҳсларида кучли рақиби, 2021-йили жаҳон чемпиони бўлган америкалик Жамал Харвини 3:2 ҳисобида мағлуб этди. Бу билан у амалда бронза медали соҳибига айланиб, Қирғизистон терма командаси ҳисобидаги биринчи медални қўлга киритди. Унинг бу ғалабасида ўзбекистонлик мараббий Акмал Хасановнинг ҳам ҳиссаси бўлиб, у қирғизистонлик спортчига секундантлик қилиб турди.

Акмал Хасанов “Озодлик”нинг қирғиз хизмати билан суҳбатда Мунарбекни анчадан бери танишини, бунгача Тошкентда ва чет элларда бирга машқларда қатнашиб юришганини айтиб берди. Шунингдек Ўзбекистон ва Қирғизистон бокс федерацияларининг ўзаро ҳамкорлиги ҳам юқори даражада. Шу сабабдан Хасанов Қирғизистон командаси бош мураббийи Данияр Тўлўгўн уулуни ҳам яхши билишини маълум қилди.

“Шунинг учун у ёрдам сўраб мурожаат қилганда сира ўйланмай рози бўлдим. Ёрдам бера олаётганимга жуда хурсанд бўлдим. Оллоҳга шукр, Мунарбек тарихга кирди”, – деди Акмал Хасанов. – “Мунарбек америкалик жаҳон чемпиони, кучли жангчи билан курашди. Мунарбек ютганда, севинганимдан кўзларимга ёш келди. Оллоҳ менга шундай тарихий вазиятда унинг ёнида бўлиш имконини берди. Насиб қилса, бу (мустақил) Қирғизистон тарихида дастлабки медал бўлади. Биз қўшниларнинг ютуғига бирга шодланиб, қувониб турибмиз”.

Секундантнинг спортчи учун қанчалик муҳим экани маълум. У жангни ташқаридан кузатиб туради, спортчининг камчилиги ва ютуқларини айтиб, унга кўрсатма беради. Танаффус пайтида спортчининг етарлича дам олишига ёрдам бериб, олдинда турган жанг тактикаси ва усуллари бўйича зарур маслаҳатларини беради.

Акмал Хасанов ярим финал жангида ҳам Мунарбекка секундант бўлиб беришга рози эканини айтиб, ҳозирда ўша жангга қаттиқ тайёргарлик кетаётганини, Қирғизистон бош мураббийи Данияр Тўлўгўн уулу билан биргаликда Мунарбекнинг бўлажак рақиби жанг тактикасини ўрганиб, таҳлил қилишаётганини маълум қилди.

Мунарбекнинг ғалабасини қирғизистонлик машҳур спортчи, бокс бўйича етти карра жаҳон чемпиони, СССРда хизмат кўрсатган спорт устаси Орзубек Назаров ҳам тарихий воқеа эканини айтди.

“Бу – тарихга кирувчи катта воқеа! У (Мунарбек) бунгача мустақил Қирғизистонда ҳали ҳеч ким қилмаган ишни қилди. Бунгача бизнинг боксчиларимиз олимпиадада ярим финалга етиб боришмас эди. Ҳа, жаҳон чемпионлари бўлган, лекин олимпиада совриндорлари бўлмаган. Бу нафақат Қирғизистон бокс федерацияси, балки бутун Қирғизистон халқи учун ҳам катта воқеа”, – деди Орзубек Назаров Мунарбекнинг тарихни ёзаётганини эътироф қилиб.

Акмал Хасанов олимпиадада Марказий Осиёдан борган боксчиларнинг Парижда бирга машқ қилиб, бирга юришганини, жуда яхши кўрсаткичларга эришаётганларини айтди.

“Бизларнинг тилимиз, урф-одатларимиз бир эмасми, ҳаммаси (қўшни давлатлар) бизларнинг дўстларимиз. Бу ерда бирга машқ қилиб, яхши натижалар кўрсатиб, юзимиз ёруғ юрибмиз. Асосийси, халқларимиз ўртасидаги аҳиллигимизни ҳам кўрсатдик”, – деди ўзбекистонлик спорт мураббийи.

Ўш шаҳрида машқ қилиб улғайган 28 ёшли Мунарбек Сейитбек ўғли бунгача бокс бўйича жаҳон чемпионатининг бронза медали (2024) совриндори бўлган. 2018-йилда ёшлар ўртасидаги Осиё чемпионатида ҳам бронза медалини қўлга киритган эди. Олимпиада ўйинларида илк бор иштирок этиши. Унинг ярим финалдаги жанги 8 август куни бўлиб ўтади. Мунарбекнинг ярим финалдаги рақиби – болгариялик Хавьер Ибаньес Диас. Мунарбекнинг тенгдоши бўлган бу спорчи асли кубалик, 86 жангдан 70тасида ғалаба қозонган. Бунгача Европа мусобақаларида совринли ўринларни эгаллаган.

Биз Мунарбекка олдинда турган жангларда ҳам муваффақият тилаймиз, Париж олимпиадасидан олтин медал билан қайтишини, шахсий ҳаётида ҳам улкан зафарларга эришишини тилаб қоламиз.

Оқбура, Бишкек.

Расм ва видео интернетдан олинди