Гринкард ўйини бошланди: Бахтини шу лотореядан излайдиганлар ҳаракатга тушишди

Лотореяда ғолибликни кафолатлайдиган қоидалар борми? Билишни истасангиз, мақолани тўла ўқинг.

АҚШнинг турли давлатлардаги элчихоналарининг расмий сайтларида Гринкард лотореясига талабномалар қабул қилиш бошлангани ҳақида хабар эълон қилинди. Талабгорлар шу йилнинг 7 ноябрига қадар dvprogram.state.gov сайти орқали анкета тўлдириб, ариза йўллашлари мумкин.

Анкета бепул экани ва ғолиблар компьютер дастури орқали тасодифан аниқланиши ҳақида қайта-қайта айтилса-да, ўртамчиликни таклиф қилган товламачилар тўрига тушганлар сони камаймаяпти. Турли шаҳарларда анкета тўлдиришга ёрдам беришни таклиф қилган уддабуронлар ҳам жонланиб қолишди. Тил билмаган кўпчилик маълум ҳақ эвазига уларнинг хизматларидан фойдаланадилар.

Дастур орқали турли давлатлар халқлари АҚШда доимий яшаш ҳуқуқини бериш мақсадида йўлга қўйилган. Расман бу Америка халқини ташкил этувчи миллатлар хилма-хиллигини ошириб бориш кўзда тутилгани билан тушунтирилади. Шу билан бирга давлат аҳолиси интилувчан, ўқимишли одамлар ҳисобига ортиб ҳам бораяпти.

Бу йилги дастур ғолиблари келаси йил май ойида, махсус компьютер дастури ёрдамида тасодифий равишда танлаб олинади. Ғолиблар расмий сайтда эълон қилинади.

Лотерея орқали ҳар йили дунё бўйлаб қарийб 100 мингдан ортиқ одам ғолиб деб топилади, лекин улардан 55 минг кишигина грин-картага эга бўлади. Ғолиб бўлганларнинг катта бир қисми ҳужжатларидаги камчиликлар, суҳбатдан ўта олмагани ёки шунчаки виза тугаб қолгани учун грин-карта ололмай қоладилар.

Товламачилик ва алданишларни олдини олиш учун АҚШнинг турли давлатлардаги элчихоналари грин-карта дастури иштирокчилари учун тавсиялар эълон қилди.

АҚШ элчихонаси элон қилган 10 маслаҳатда дастур талаблари, ариза тўлдириш қоидалари ва фирибгарлардан эҳтиёт бўлиш учун тавсиялар жой олган. Қуйида улар билан тиншиш мумкин.

  1. dvprogram.state.gov сайти орқали дастур шартлари билан танишиб чиқинг. Агар дастур талабларига жавоб бермасангиз, унда иштирок этманг;
  2. Фақат АҚШ ҳукуматининг расмий веб-сайтларида келтирилган маълумотларга таянинг. DV2025 дастури бўйича маълумотни тақдим этувчи ягона расмий манба «.gov» билан якунланган веб-сайтлар ҳисобланади;
  3. dvprogram.state.gov сайти орқали ариза топширинг. Бу дастурда иштирок этишнинг ягона йўлидир. Сохта веб-сайтлар ёки фирибгарларга алданиб қолманг;
  4. Дастурда иштирок этиш учун ариза топшириш бепул. Аризангизни бепул тўлдириб беришни таклиф этадиган ёки тўлов орқали дастурда имкониятингизни ошириб беришни ваъда қиладиган шахслардан эҳтиёт бўлинг;
  5. Охирги 6 ой ичида олинган фотосуратингиздан фойдаланинг. Ариза топшириш вақтида эски фотосуратдан фойдаланиш дастурдан четлатишга сабаб бўлади;
  6. Бир иштирокчи фақатгина бир марта ариза топшириши мумкин. Бир дастур мавсуми давомида, бир мартадан кўп ариза топширган шахслар дастурдан четлатилади;
  7. Сиз билан бирга саёҳат ёки иммиграция қилмайдиган тақдирда ҳам, аризангизга турмуш ўртоғингиз ва 21 ёшдан кичик ва турмуш қурмаган барча фарзандларингизни киритиш кераклигини ёдда тутинг. Дастурда иштирок этиш учун танланган ҳолатингизда ҳам, аризангизга хато ёки тўлиқ бўлмаган маълумот киритган бўлсангиз, дастурдан четлатилишингизни инобатга олинг;
  8. Махсус тасдиқлов рақамингизни (confirmation number) сақлаб қўйинг. 2024 йил май ойида дастур бўйича танлов натижасини текшириш учун ушбу рақам керак бўлади;
  9. Дастур бўйича танлов 2024 йил май ойида бўлиб ўтади. Дастурда иштирок этиш учун танлаб олинганингиз ҳақида маълумотга эга бўлишнинг ягона йўли dvprogram.state.gov/ESC сайти орқалидир. Бирон-бир хат ёки e-mail орқали келган эълонларга алданиб қолманг, бу турдаги хатлар фирибгарлик усули эканини ёдда тутинг;
  10. Дастурда танлаб олинганлик — виза учун суҳбатда иштирок этиш ёки виза олиш кафолатини бермаслигини ёдда тутинг.

Ўзбекистоннинг Kun.uz нашри ҳам бир неча йил олдин грин-карта анкетасини мустақил ва тўғри тўлдириш бўйича йўриқнома тайёрлаган. Бу бошқа давлатлардаги лоторея ишқибозлари учун ҳам фойдали бўлади, деган мақсадда уни эълон қиламиз.

Грин-карта анкетасини мустақил ва тўғри тўлдириш бўйича йўриқнома

Kun.uz грин-карта анкетасини бехато тўлдириш бўйича йўриқномани тақдим этади. Унинг ёрдамида инглиз тилини билмаганлар ҳам фирибгарга учраб қолиш эҳтимолисиз, бепул ва мустақил тарзда рўйхатдан ўтишлари мумкин.

Diversity Visa учун ариза онлайн топширилади. Ариза топшириш бепул. Бир киши бир йилда фақат бир марта (одатда октябр-ноябр ойларида) анкета тўлдириш ҳуқуқига эга, шу давр ичида такрорий ариза берганлар иштирокчилар сафидан четлатилади.

Электрон анкетани тўлдириш вақти – 30 дақиқа. Шу сабабли анкета тўлдиришни бошлашдан олдин қуйидагиларни тайёрлаб олинг:

Хорижга чиқиш паспортингиз бўлиши керак

Суратга тушинг (батафсил 8-бандда)

Почта индексингизни аниқлаб олинг (батафсил 9-бандда)

Электрон почтангиз бўлмаса, очиб олинг (батафсил 12-бандда)

Браузерингиз янги экани ва интернет барқарор ишлаётганига ишонч ҳосил қилинг.

Уларнинг барчаси шай бўлса, dvprogram.state.gov сайтига кириб, Begin Entry яшил тугмасини босинг. Кейинги саҳифада сиздан суратдаги ҳарф ва рақамларни киритиш сўралади. Капчани ўқий олмасангиз, унинг ўнг ёнидаги тугмани босиб, янгилашингиз мумкин. Бу сизнинг «дастурий робот» эмаслигингизни исботлаш учун керак.

Анкетага киритиладиган барча маълумотлар хорижга чиқиш паспортингиздаги билан айнан бир хил бўлишига эътибор беринг. Қуйида анкетадаги саволларнинг тартиб рақами бўйича тўлдириш кўрсатмаларини санаб ўтамиз.

Анкета тўлдиришда сўзларни тўлиқ бош ҳарфда (ESHMAT) ёки фақатгина биринчи ҳарфини бош ҳарфда (Eshmat) ёзиш мумкин, бу аҳамиятсиз. Муҳими, фақат лотин ҳарфларидан фойдаланиш зарур.

  1. Last/Family Name– фамилия; First Name – исм. Middle Name – иккинчи исм, бу ўзбекистонликларга тааллуқли эмас, шу сабаб No Middle Name дея белгилаш лозим.
  2. Жинсингизни кўрсатинг: Male– эркак; Female – аёл.
  3. Туғилган сана(рақамларда киритилади): Month – ой, Day – кун,Year – йил. Эътибор беринг, биринчи бўлиб ой ёзилади.
  4. Сиз туғилган шаҳар.2018 йил ҳолатига, Ўзбекистонда 30та шаҳар мавжуд. Шаҳарларда туғилган фуқаролар учун бу бандда муаммо бўлмайди: шаҳар номи лотин алифбосида киритилади холос. Бошқа ҳолатларда, яъни туғилган жойи шаҳар мақомида бўлмаган кишилар туғилганлик ҳақидаги гувоҳномада кўрсатилган жой (аҳоли яшаш пункти) номини киритишлари мақсадга мувофиқ. Масалан, Ketmontepa QFY, Navruz MFY.

Бу бандда фақатгина аҳоли пункти номини кўрсатиш, яъни туман ёки вилоятни ёзмаслик талаб этилган. Шу боис Ўзбекистон фуқароси паспортидаги туғилган жойи (Place of birth)да нима ёзилган бўлса, бу бандга шуни кўчириб қўйиш ҳар доим ҳам тўғри эмас. Чунки паспортда Тошкент шаҳридан бошқа ҳудудларда дунёга келган фуқароларнинг туғилган жойи сифатида улар таваллуд топган вилоятлар ёки Қорақалпоғистон Республикаси кўрсатилган.

Агар туғилган жойингиз номаълум бўлса, Birth City Unknown (Туғилган шаҳрим маълум эмас) катакчасини белгиланг.

  1. Сиз туғилган мамлакат.Рўйхатдан Ўзбекистонни танлаймиз (Uzbekistan).
  2. Ўзбекистонда туғилган Ўзбекистон фуқаролари олтинчи бандга тегмай ўтиб кетишлари мумкин (Yesкатакчаси автоматик белгиланиб туради). Бу банд – туғилган давлати лотереяда қатнашадиган давлатлар рўйхатида бўлмаган шахслар учун.
  3. Паспорт маълумотлари.1-банддаги каби исм ва фамилиянгизни киритиб, No Middle Name катагини белгилайсиз.

Passport Number‘га хорижга чиқиш биометрик паспортингиз серия ва рақами;

Passport Expiration Date‘га паспортнинг амал қилиш муддати (ой, кун, йил тартибида – яна эътибор беринг, паспортдагидан фарқли равишда, анкетанинг бу ерида ҳам биринчи бўлиб ойни кўрсатиш керак);

Country/Authority of Issiance – паспорт берилган мамлакатга Ўзбекистонни кўрсатинг.

Фуқаролиги бўлмаган шахслар 7-банднинг «B» қисми катакчасини белгилаб, биринчи вариантни (Stateless – фуқаролиги йўқ) танлайдилар.

  1. Фотосурат. Ўзингизнинг охирги 6 ой ичида тушган суратингизни жойланг. Суратга қўйиладиган талаблар талайгина, шу сабабли энг яхшиси – профессионал суратхонага бориб, сураткашга грин-карта учун расмга олиб қўйишини сўраш.

Олинган расмни қуйидаги расмий сайтда келтирилган намуналарга мослигини текширинг. Барчаси кўнгилдагидек бўлса, расмни флешкангиз, телефонингиз ёки Telegram’ингизга ўтказиб олинг.

Эслатиб ўтамиз, расмга камерага қараб, оқ ёки бошқа очроқ рангдаги фонда, кўзойнак ва кепка каби юзни тўсувчи деталларсиз тушиш керак. Расмга соя тушиб турмаслиги зарур. Агар рўмолда бўлсангиз, рўмол юзингизни тўсиб турмаслигига эътибор қилинг.

Суратнинг техник кўрсаткичларига келсак, фото JPEG форматда, максимал 240 КБ ҳажмда, ўлчами 600×600дан 1200×1200гача пиксел оралиғида, 24 бит ранг чуқурлигида бўлиши керак.

  1. Почта манзили.Бу сизнинг ёки бирор яқинингизнинг манзили бўлиши мумкин. Манзил сифатида истаган давлатингизни белгилашингиз мумкин.

In Care Of – бу ерга почта манзилидаги шахснинг исми ва фамилияси ёзилади. Унга ўзингизнинг исм-фамилиянгизни ёзсангиз ҳам бўлади.

Address Line 1 – ушбу бандда кўча номи, уй ва хонадон рақами кўрсатилади. Почта индекси кўрсатилмайди. Иккинчи қатор (Address Line 2) жой ёки кўча номи биринчи қаторга сиғмаганда ёзиш учун ишлатилади; агар сизда биринчи қаторга сиққан бўлса, бу қатор бўш қолдирилади.

City / Town – яшаш жойининг номи.

District / Country / Province / State – туман / ўлка / вилоят / округ (штат) номи. Агар Тошкент шаҳрида яшасангиз, бундан олдинги бандда уни кўрсатган бўласиз, лекин бу катак бўш қолиши мумкин эмас, шу боис иккинчи марта Тошкент деб ёзиб қўясиз. Қолган барча шаҳар ва туманлар эса қайсидир бир вилоят ёки Қорақалпоғистон Республикаси таркибига киради.

Postal Code / Zip Code – почта индекси. Почта индексини «Ўзбекистон почтаси» расмий сайтининг ушбу саҳифасида келтирилган қуйидаги файл (архивланган excel-файл) орқали билиб олишингиз мумкин. Агар сиз яшайдиган жойнинг почта индекси бўлмаса, No Postal Code / Zip Code катакчасини белгилаб қўясиз.

  1. Country Where You Live Today – Сиз ҳозир яшаётган мамлакат. Рўйхатдан ўтаётган вақтингизда қайси давлатда яшаётганингизни кўрсатиш зарур.
  2. Phone Number – телефон рақамингизни халқаро форматда киритинг. Масалан, +998901234567.
  3. E-mail. Биринчи қаторга электрон почта манзилингизни, иккинчи қаторга шу манзилни қайтадан кўчириб ёзинг. Электрон почтангиз бўлмаса, Google, Yandexкабилардан 1-3 дақиқа ичида очиб олишингиз мумкин.
  4. Бугунги кун ҳолатига сиз эгаллаган таълимнинг энг юқори даражаси қайси?Кўрсатилган вариантлардан бирини танлаш лозим.
  • Primary school only – фақат бошланғич мактаб
    • High School, no degree – ўрта мактаб, лекин шаҳодатномаси йўқ
    • High School, degree – ўрта мактаб, шаҳодатномага эга (академик лицейни тамомлаганлар ҳам шу бандни танлашади)
    • Vocational School – касб-ҳунар коллежи
    • Some University Courses – тўлиқсиз олий (бакалавриат талабалари шу бандни танлашади)
    • University Degree – олий маълумот (бакалавр даражасига эга фуқаролар учун)
    • Some Graduate Level Courses – бир қанча магистратура даражасидаги курслар (магистратура талабалари шу бандни танлашади)
    • Master’s Degree – магистр даражаси
    • Some Doctorate Level Courses – тугалланмаган аспирантура/докторантура (аспирантура ва докторантура тадқиқотчилари шу бандни танлашади)
    • Doctorate Degree – докторант даражаси
  1. Оилавий ҳолатингиз.Кўрсатилган вариантлардан бирини танлаш лозим.

Unmarried – Ҳеч қачон турмуш қурмаганман.

Married and my spouse is NOT a U.S. citizen or U.S. Lawful Permanent Resident (LPR)  – Оила қурганман, турмуш ўртоғим АҚШ фуқароси эмас ёки АҚШда яшаш ҳуқуқига эга эмас.

Married and my spouse IS a U.S. citizen or U.S. Lawful Permanent Resident (LPR) – Оила қурганман, турмуш ўртоғим АҚШ фуқароси ёки АҚШда яшаш ҳуқуқига эга. Ушбу икки банддан бирини сиз турмуш ўртоғингиз билан анчадан бери яшамаётган бўлсангиз-у, лекин қонуний никоҳ мавжуд бўлганда ҳам белгилайсиз, ҳаттоки никоҳингиз бекор қилиниш босқичида-ю, лекин ариза тўлдираётган вақтингизда никоҳ ўз кучида бўлса ҳам.

Divorced – Ажрашганман.

Widowed – Турмуш ўртоғим вафот этган.

Legally Separated – МДҲ давлатларида Legally Separated ҳолатининг юридик асоси йўқ, шу боис бу бандни белгилаш суҳбат жараёнида аризани рад этишга сабаб бўлиши мумкин.

Агар сиз шаръий никоҳ билан яшаётган бўлсангиз-у, лекин ҳали қонуний никоҳдан ўтишга улгурмаган бўлсангиз, Married бандини танлай олмайсиз. Биринчи турмушига унаштирилганлар ҳам Unmarried бандини ташлаши зарур.

  1. Number of Children –фарзандлар сони. Бу ерга21 ёшга тўлмаган барча фарзандларингиз сонини (никоҳдаги фарзандингиз бўлиши шарт эмас) кўрсатасиз. АҚШ фуқароси ёки у ерда доимий яшовчи фарзандингиз бўлса, у ҳисобга киритилмайди. Ушбу бандга фарзандларингиз сонини рақам билан ёзасиз; агар фарзандингиз бўлмаса, ноль ёзасиз.

Бу бандда хотинингиз/эрингизнинг аввалги никоҳидаги фарзандларини ҳам ёзасиз (21 ёшга тўлмаганларини). Хотинингиз/эрингизнинг ўзи боқиб олган фарзандини кўрсатиш шарт эмас, уни ўша аризачининг ўзи кўрсатади.

Шундан сўнг ёзганларингизни бир текшириб чиқинг ва Continue (Давом этиш) тугмасини босинг.

Турмуш ўртоғингиз ва фарзандларингизни кўрсатган бўлсангиз, аризанинг иккинчи қисми очилади. Иккинчи қисмга уларнинг маълумотларини юқоридаги каби тўлдириб чиқасиз. Ҳар ким учун ўзининг расми сўралади.

Агар турмуш ўртоғингизнинг ўзи ҳам лотореяда қатнашишни истаса, алоҳида анкета тўлдиради. Иккинчи қисмга эса сизнинг маълумотларингизни ёзади. Бундай ҳолатда ютиш эҳтимоли ортади.

Барча жараёнлар тугаганидан сўнг, Continue тугмаси босилади. Шундан сўнг очилган саҳифа орқали сиз анкетани бир қатор кўздан кечириб чиқишингиз лозим. Хатоликлар бўлса, ортга қайтиб, тўғирлаш мумкин.

Барчаси жойида эканига ишонч ҳосил қилганингиздан сўнг, яшил рангли Submit тугмасини босасиз. Анкета муваффақиятли тўлдирилгани ҳақидаги саҳифа очилади. Бу саҳифада исм-шарифингиз, анкета тўлдирилган сана, натижани текшириш коди (16 белгидан иборат) жой олган. Аввалига дарҳол саҳифани телефонингиз ёрдамида расмга тушириб олинг. Шундан сўнг саҳифа юқорисидаги Print (Чоп этиш) тугмаси орқали принтердан чиқаришингиз ёки кодни бирор ишончли жойга ёзиб олишингиз зарур.

Лотерея натижалари кейинги йил май ойида dvprogram.state.gov сайтида эълон қилинади. Натижани кўриш учун сиз сақлаб қўйган маълумотларни киритиш лозим.

Танланган аризачилар кейинги босқичлардан ўта олса, ариза тўлдирганидан 1,5–2 йил ўтиб АҚШга кўчиб кетиши мумкин бўлади.

Оқбура, Бишкек.

Расм интернетдан олинди

боғлиқ хабарлар

Изоҳ қолдиринг