Эллик олти йил: Собиқ президент Бакиев яна 30 йиллик қамоққа ҳукм қилиндими?
Қирғизистон расмийларини бунгача собиқ президентни оқлашга уринишда айблашган эди.
Қирғизистоннинг бунгача сиртдан 26 йилга қамалиб, Беларусда бошпана топиб келаётган собиқ президенти Қурманбек Бакиев яна 30 йиллик қамоқ жазосига ҳукм қилинди. Бу сафар у “Қумтўр” олтин кони иши бўйича коррупцияда айбланган.
Маҳаллий 24.kg сайтининг суд идораларига таяниб берган маълумотига кўра, собиқ президент билан бирга бир қатор собиқ амалдорлар ҳам турли муддатларга озодликдан маҳрум қилинди. Айрим маълумотларга кўра, Бакиевга 30 эмас, 10 йил қамоқ жазоси берилган.
Қурманбек Бакиевга бунгача 2010 йилда юз берган давлат тўнтариши пайтида тинч аҳолига ўқ отишга рухсат берганлик ва бошқа айбловлар қўйилиб, сиртдан 26 йиллик қамоқ жазосига ҳукм қилинган эди.
Ўн икки йилдан кўпроқ Беларуснинг Минск шаҳрида бошпана топиб, бизнес билан шуғулланиб келаётган Бакиев бу айбловларни асоссиз деб ҳисоблайди ва адолатли суд иши ташкил қилинган ҳолатда, Бишкекка келишга ёки онлайн тарзда тергов ва суднинг барча саволларига жавоб бериб, ўзининг айбсиз эканини исботлашга тайёр эканини айтиб келади.
Бакиевга нисбатан нисбатан холисона муносабат билдириб келгани учун аҳолининг бир қисми бугунги президент Садир Жапаров ва унинг дўсти, махсус хизмат раҳбари Қамчибек Ташиевни собиқ президентни оқлашга уринишда айблаб келади.
Яқинда Минск шаҳрига бориб, Қурманбек Бакиев билан видео суҳбат қуриб, уни интернетда эълон қилган журналист Қадирбек Қўшалиев ўз ихтиёри билан ишдан бўшашга мажбур бўлди. Суҳбатда журналист собиқ давлат раҳбарига хайрихоҳлик руҳидаги саволларни бериб, унга ўзини оқлашига имкон яратишга ҳаракат қилгани кўриниб туради.
Сюжет тез орада мамлакатда жиддий норозиликларга сабаб бўлди.
Шундан сўнг журналист ишлаб келган Миллий телерадиокорпорациясидан маълум қилишларича, корпорацияда ички текширув бошланган ва журналист “компания обрўсига путур етказмаслик учун” комиссия иши ниҳоясига етишини кутиб ўтирмай, ишдан бўшаб кетган. Кейинроқ журналист Қурултой раиси лавозимидан ҳам кетган.
Энди эса гап 2013 йилда қўзғалган жиноий иш ҳақида бўлиб, унга кўра, давлатнинг ўша пайтдаги раҳбарияти ва турли даражадаги амалдорлар “Қумтўр” олтин конини ишлатиш бўйича Канаданинг “Қумтўр Голд Компани”, “Центерра Голд” ва Қирғизистоннинг “Қирғизалтин” Ҳиссадорлик жамияти ўртасидаги шартнома ноқонуний имзоланган.
Садир Жапаров давлат бошлиғи сифатида иш бошлагач, ўша ва “Қумтўр” олтин кони билан боғлиқ бошқа шартномалар бекор қилиниб, Қирғизистон ушбу олтин конини ва олтин ишлаб чиқарувчи корхонани ўз тасарруфига олган. Корхона бунга қадар давлат ички ялпи маҳсулотининг 10 фоизини бериб келган.
Судланганлар орасида собиқ президентнинг ўғли Максим Бакиев ҳам бор. У умрбод қамоқ жазосига ҳукм қилиниб, мулки мусодора қилинадиган бўлди. Максим Бакиев отасининг президентлиги даврида конституцияга зид равишда тузилган давлат агентлиги бошлиғи сифатида тўлалигича ҳукумат ишини ўз назоратига олган эди. Максим ҳозирда Англияда бизнес ишлари билан машғул.
Ота-боладан ташқари бу иш бўйича бошқа амадорлар ҳам жазога тортилиб, 10 йилдан 30 йилгача озодликдан маҳрум қилинганлар.
Аввал эълон қилинган хабарда суд ҳукмига кўра, Максим Бакиевнинг яқин сафдоши, Centerra Gold компаниясининг директорлар кенгаши аъзоси Алексей Елисеевга ҳам узоқ муддатли қамоқ жазоси берилгани айтилган.
Хабар эълон қилингач, Елисеев раддия эълон қилди. Унинг айтишича, «Қумтўр»ни Қирғизистонга ўтказиб бериш бўйича 2022 йилнинг 4 апрелида имзоланган келишимда Centerra Gold компанияси директорлар кенгаши аъзоларига нисбатан тергов ва суд ишлари очилиши мумкин эмас, очилган бўлса ёпилиши керак бўлган.
Оқбура, Бишкек.
Расм интернетдан олинди
