Олимпиада-2024: Мээрим кумуш, Жўламан бронза медалларини ютиб олишди
Ниҳоят Қирғизистон спортчилари олимпиада ўйинларида ўз медаллари ҳисобини очиб беришди.
Аёллар курашида 68 килограммгача бўлган тоифада курашиб келаётган Мээрим Жуманазарова финалда америкалик рақиби, икки карра дунё чемпиони, кўпдан бери енгилиш нималигини билмай келаётган Эмит Элорга ютқазиб қўйди. Лекин полвон қиз Токио олипиадасида эришган кўрсаткичини (бронза медали) яхшилади ва кумуш медал соҳибаси бўлди. Шу куниёқ эркак курашчилар орасида Жўламан Шаршенбеков ҳам эронлик рақибини енгиб, бронза медалини ютиб олди. Бу қирғизистонлик спортчилар Париж олимпиадасида ютиб олган илк медаллардир.
Мээримнинг жиддий жароҳати борлиги, олимпиадага қатнашиш учун врачлар тавсия қилган жарроҳлик амалиётидан воз кечиб, машқларни давом эттиргани ва олимпиядада шундай натижага эришганини ҳисобга олсак, бу ғалаба олтин медал олган билан баробар дейиш мумкин. Қолаверса, унинг финалдаги рақибаси жаҳоннинг энг жуда кучли спортчиларидан бири саналади. Демак, Мээримнинг олтин медал марраси кейинги олимпиядага қолди.
Мээрим Жуманазарова эндигина 24 ёшга кирди, демак келажак ҳали олдинда. Бунгача у Токио олимпиядасида бронза медалини ютган бўлса, Осиё чемпиони бўлган, Осиё даражасидаги йирик мусобақаларда бир неча бор кумуш ва бронза медалларни ютиб олган. Асли толаслик, биринчи ва шахсий мураббийи – отаси Дуйшўн Жуманазаров, онаси – Айнура Чўлпўнқулова фельдшер-лаборант бўлиб ишлайди. Мээрим оилада саккиз фарзанднинг тўртинчиси.
Чорак финалдаги мағлубиятдан кейин анчагача ўзини йиғидан тия олмаган ва бу ҳақдаги видеоси кенг тарқалган Жўламан Шаршенбеков ўзининг эронлик рақиби Меҳди Нежадни енгиб, бронза медали совриндори бўлди. Бу – Қирғизистоннинг Париж олимпиядасидаги илк медали бўлди.
Жўламан ғалабасидан кейин “Озодлик”нинг қирғиз хизматига интервью бериб, аслида олтин медал олишни мақсад қилгани, лекин бу кўрсаткичини Оллоҳнинг буйруғи сифатида қабул қилишини айтди. Шунингдек у машқ қилишдан тўхтамаслигини, кейинги олимпиядага тайёрланишда давом этишини маълум қилди. Жўламаннинг ғалабасидан кейин президент Садир Жапаров унга шахсан қўнғироқ қилиб, ушбу бронзани мамлакат халқи олтин медал қатори қабул қилишини маълум қилган.
Жўламан кураш бўйича жаҳон рейтингида энг юқори ўринда бўлиб келгани учун ҳамма ундан олтин медал кутган эди. Лекин унинг отасининг айтишича, кейинги пайтларда спортчи кўплаган мусобақаларда ва машқларда ўзини кўп уринтириб қўйгани боис бироз чарчоқ ҳолида бўлган. Жўламан Шаршенбеков ёши 25да бўлишига қарамай, грек-рим кураши бўйича икки карра жаҳон чемпиони бўлиб, икки марта кумуш медал олган бўлса, Осиё чемпионатларида уч марта чемпион, икки марта кумуш медал совриндори бўлган. Унинг орзуси – олимпияда чемпиони бўлиш. Ушбу мақсадига 2028 йили Лос-Анжелесда ўтадиган олимпия ўйинларида етишишига тилак билдирамиз.
Яна икки бронзага ишонч бор
Париждаги олимпияданинг илғор спортчиларидан бири, олтин медалга даъвогарлик қилиб келаётган яна бир курашчи Ақжол Махмудов бронза учун курашади. У чорак финалда қозоғистонлик рақибига ютқазиб қўйиб, финал учрашувларига чиқа олмаган эди. У бугун, 7 август куни колумбиялик курашчи Алексис Муньозга қарши майдонга тушади.
Яна бир қирғизистонлик курашчи Узур Жусупбеков ҳам бронза медали учун курашиш ҳуқуқини олди. У ҳам бугун бронза медали учун АҚШ спортчиси Жосеф Патрик Рау билан куч синашади.
Улардан ташқари курашчи қизлардан Айсулуу Тинибекова ва Айпери Медет қизи, эркаклардан Айаал Лазарев ҳам ўз мусобақаларини кутиб туришибди. Улар ҳам медалларга даъвогар спортчилардан. Уларнинг ҳаммасига омад тилаймиз!
Оқбура, Бишкек.
Расм интернетдан олинди
