Олимпиада-2024: Битта кумуш чўнтакда, олтин ва бронза медаллар учун курашиш керак
Қирғизистоннинг энг кучли спортчиларидан бири ўйиндан чиқди, лекин ҳали ғалабаларга умид катта.
Бугунги энг қувончли янгилик – аёллар кураши бўйича Мээрим Жуманазарова финалга чиқди. Бу дегани, Мээрим ўзига кумуш медални кафолатлаб қўйди. Лекин унинг мураббийи Чинарбек Изабеков шогирди билан олимпиадага олтин медал учун келишганини айтди. Финал ўйини бугун кечқурун бўлиб ўтади.
Мээримнинг рақиби икки карра дунё чемпиони, америкалик Эмит Элор эканини ҳисобга олсак, кураш осон кечмаслиги маълум бўлади. Қолаверса, спортчи қизимизнинг жиддий жароҳати бор. Олимпиадага қатнашиш учун Мээрим врачлар тавсия қилган амалиётдан вақтинча воз кечган.
Лекин Париждаги олимпиада ўйинларида икки рақибини 8:3 ва 8:6 ҳисобида ютгани ва энг муҳими, ўзининг эски рақиби нигериялик 35 ёшли Блессинг Оборудудуни 3:1 ҳисобида енгиб олганига қараганда, Мээрим жуда яхши тайёргарлик кўрган. Бунгача Мээрим Оборудудуга икки марта, жумладан Токиодаги олимпиадада ютқазиб қўйган ва сўнгида бронза медали билан кифояланган эди.
Мээрим Жуманазарова 25 ёшда. Аёллар кураши бўйича жаҳон ва Осиё чемпиони.
Эх, Ақжўл, Ақжўл!
Бугунги куннинг энг ачинарли хабари шу бўлдики, машҳур курашчи, Қирғизистон спортининг энг олдинги сафида бораётган, Парижда олтин медалга ҳақиқий даъвогар сифатида тан олинган Ақжўл Махмудов ўйиндан чиқди. Биринчи ўйинни эса ғалаба билан бошлаган эди. Бугун икки карра жаҳон чемпиони, Токио олимпиадасининг кумуш медали соҳиби, 25 ёшли Ақжўл Махмудов ва Осиё чемпиони, 28 ёшли Узур Жусупбековлар майдонга тушишиб, чорак финалга йўлланма олишганда ҳамма қувонган эди.
Нимчорак финалида тажрибали Ақжўл ўзининг эски рақиби, америкалик Камал Бейни осонгина енгган бўлса, Узур ўзининг литвалик рақиби Миндаугас Венкайтисни енгиш учун анча куч сарфлади.
Афсуски, чорак финалда бу икки спортчи кутилмаганда ғалабани бой бериб қўйишди. Ақжўл Махмудов қозоғистонлик спортчи Демеу Жадраевга 1:3 ҳисобида ютқазса, Узур Жусупбеков эронлик рақиби Моҳаммадхави Саравига 8:0 ҳисобида енгилиб қолди.
Ақжўлнинг мағлубияти спорт мухлислари учун катта зарба бўлди, чунки унинг Париждан олтин медал билан қайтишига ҳеч ким шубҳа қилмаган эди. Лекин қирғизистонликлар учун бу ҳақиқат қанчалик аччиқ бўлмасин, спорт шуниси билан қизиқ.
Бугун бунгача грек-рим кураши бўйича эркак курашчилардан Жўламан Шаршенбеков ярим финал ўйинларида япониялик курашчи, Токио олимпиадасининг кумуш медали соҳиби Кеничиро Фумитага 3:4 ҳисобида ютқазиб қўйганди. Ўтган йили Жўламан бу рақибини жаҳон чемпионатида 11:6 ҳисобида енгиб, олтин медал ютиб олган эди.
Энди икки карра жаҳон чемпиони, 25 ёшли спортчи бугун кечқурун бронза медали учун курашга тушади. Мутахассислар Жўламаннинг бронза медалини ютиб олиш имкониятлари катта эканини айтишмоқда.
Мана шундай ачинарли хабарларга қарамай, бугунгача бирорта медал олмаган Қирғизистон спортчиларининг медаллар қопчиғи шу кунларда тўлиб қолиши кутилмоқда. Чунки кураш бўйича мусобақаларда иштирок этаётган ҳар бир спортчининг ғалаба қозониш имкониятлари яхши.
Курашчи йигитлардан Жўламан Шаршенбеков, Аййал Лазарев, Амантур Исмаилов, Бекзат Алмаз уулу, Эрназар Акматалиевлар ҳам мухлисларига умид бағишлаб турибди.
Бундан ташқари дзю-до устаси Эрлан Шеров ҳам медалларга давогарлик қилмоқда.
Уларга боксчи Мунарбекнинг камида бронза медали қўшилса, қирғизистонлик спортчилар Париждан ёруғ юз билан қайтишларига умид бор.
Курашчи қизлардан Токиода кумуш медалини енгиб олган Айсулуу Тинибекова ва Токиодан бронза билан қайтган Мээрим Жуманазарованинг олтин медал ютиб олишларига ишонч катта. Токиодаги ўйинларда бешинчи ўринни олган курашчи қиз Айпери Медет қизи ҳам бу сафар мухлисларига катта қувонч бағишлаши мумкин.
Мана шундай бўлиб қолишига умид билдириб, спортчиларимизга ана шундай зафарлар тилаб қоламиз.
Оқбура, Бишкек.
Расм интернетдан олинди
